電腦J手記
資訊科技總監辦公室（OGCIO）推出新飛卜專頁，向公眾解釋政府資訊科技政策， 包括新一代智能身份證及智慧燈柱等項目，釋除市民嘅疑慮，據聞Victor Lam對於專頁好大期望，以公眾對於政府信心低落，燈柱更成為示威者發泄對象。
以往政府曾經試過以OGCIO協調政府部門資訊科技，結果不太成功，政府部門各自為政，OGCIO角色非常有限，後來上屆政府想搞創科及智慧城市，結果搞咗一輪，先搞咗起動東九龍，然後成立創科局，大力投資香港創科園區，智慧燈柱算係近年OGCIO主打項目，涉及多個部門，結果受多方質疑。
以往OGCIO靠創科局飛卜出鋪史，如今自行搞飛卜專頁，可以日日發文，甚至可以Boost下，總監搞埋答客問，希望多啲人關注。
智慧燈柱用於蒐集城市數據，對未來城市規畫好有用，不過整個過程對公眾解說不足，即使業內亦有意見。結果各方質疑下，唔少功能暫停，到頭來可能成為天氣或空氣監察站，只有環保署及天文台係用家。
智慧燈柱用於蒐集車流人流數據，取代以往靠人手統計，當然亦可用於執法。以監控鏡頭執法，西方國家之中最普遍係英國。據英國Comparitech統計，倫敦係全球第6個監控鏡頭最多城市（據上述統計，全球最多監控鏡頭係重慶市，大概為打擊罪案）。
不過，據2017年Brookings研究中心發表數據，倫敦監視鏡頭多達42萬個，相等每一千人48個鏡頭，只係比北京略少。英國有北愛問題，又受恐怖襲擊；而且又係西方民主，政府監控大條道理。近期，英國警方開始警車上安裝人臉識別鏡頭，街上即時辨認通緝犯，但近期有關監控鏡頭侵犯私隱，英國引起關注。
英國國會已要求暫停利用人臉識別功能，倫敦市長簡世德亦呼籲，指人臉識別有嚴重及廣泛關注。英國私隱監管專員亦在調查，今個月英國卡地夫市（Cardiff）一名市民入稟法院，要求南威爾斯警方停止以人臉識別，指以軟件掃描及辨認臉孔侵犯人權，但遭法院駁回，目前。但有關人臉識別正在歐洲引起爭議，尤其人臉識別技術辨別有色人種，凖確度令人懷疑，隨時錯認良民。
OGCIO強調香港智慧燈柱上，鏡頭上並無人臉識別功能，不過市民對政府信任度低，質疑政府公信力，飛卜日日發文，即使搞番對話平台，都未必有人信。燈柱又無腳會走，下次示威又成破壞目標，有幾智慧都無用。
英國警方嘅人臉識別鏡頭，則安裝在警車上，有事時馬上散水，不作無謂犧牲。另外，深圳亦有多功能智能杆，其實唔一定係燈柱，除咗傳應器，亦作為5G基站，深圳搞多功能智能杆，舉辦唔少活動，又公佈
《深圳市新型智慧城市建設總體方案》、《深圳市多功能智慧杆建設發展行動計畫（2018－2020）》多份文件，舉辦深圳市多功能智慧杆外觀造型設計比賽，今年初又辦5G多功能智慧杆支撐未來新型顯示智慧城市高峰論壇，邀請美國國家工程院院士陳世卿、南非科學院院士彼得羅．特布蘭奇、澳洲國家工程院外籍院士劉科、南非皇家科學院院士韋甘司然．奈度等。設計多功能杆邀請4位院士，可見深圳有重視。
據聞深圳正成立獨立公司營運多功能智能杆，以免公營部門拖拖拉拉。
深圳以多功能智能杆命名，比較智慧燈柱更貼切，因為智能杆上可能有雷達及5G設備，供車聯網發展，可能係一直發展嘅技術，而唔係搵幾家公司試驗一輪，經選美就可決定，深圳市係將多功能智能杆作為長期發展計畫，效果可能更好。
目前香港智能燈柱，持份者太多，反而造成混亂。