本星期，數碼港舉行「數碼娛樂領袖論壇」，同時電競場地開幕，包括多場電競比賽，由於數碼港商場全天候廣場上設有天幕，廣場內設有三個巨型LED屏幕，速度反應極快，好少人有機會在極大屏幕上打機，數碼港前行政總裁Herman Lam亦返來捧場觀戰，睇完「英雄聯盟」對決賽，九龍電競隊迎戰香港首支職業電競隊Hong Kong Attitude（HKA）後，出場後向創科局副局長David Chung大呼過癮。
Herman與David均是咪記舊人，曾經在數碼港工作多時，數碼港變身電競場地，數碼港亦會聯同香港電競總會舉辦首個全港性電競聯賽「香港電競超級聯賽」，今年12 月數碼港舉行決賽。雖然可以在電腦或電視睇直播，但以視覺震撼及聲響，始終同現場有好大分別，相信屆時肯定坐無虛設。
雖然會場內有唔少電競遊戲及配件展示，但係亦有唔少視覺技術，包括Marvel Digital（萬維數碼）展示裸眼3D展示屏，毋須3D眼鏡亦可展示立體內容，Marvel亦有生產深度鏡頭，開發「視覺動力」3D軟件解決方案，提供一站式3D內容製作、轉換及管理等服務。 當中的3D內容轉換服務，可將普通2D內容轉換成清晰逼真的3D影片，增加遊戲逼真感。
Marvel Digital係科學園公司，亦正考慮到數碼港參與開發3D遊戲內容；業務發展經理Derek陳家雄話，渠地亦發展多項光學深度鏡頭，應用在機器人及航拍。Derek亦展示3D手機，卡通人物呼之欲出，但必須要利用特製展示屏。
另一家展示內容創作嘅Redspots Creative，則可以即時將真人，利用人體感應裝置變成卡通人物，並且加入不同場景，卡通人物甚至可按真人表情，隨人臉識別而變化，相當神奇，此後可以極低成本製作動畫，連同感應器及軟件，設備只要3萬港元。據講有學校已經購置供學生拍攝卡通片。Redspots Creative創辦人Kevin Lee以前在TVB任職導演，大台亦測試呢套製作工具。
不過，同場亦有唔少港產遊戲任玩，包括Godzpeed賽車遊戲、港產VR 電競盒VAR BOX、遙控對戰機械人Ganker EX等。數碼港老總任景信話，開發Ganker EX嘅工匠社係數碼港畢業生，目前全球有數百萬粉絲，呢項格鬥機器人獲股王騰訊投資，延續香港作為玩具王國嘅神話。
博通（Broadcom）放棄收購Symantec，股價一日內下跌一成三。一想到博通收購保安軟件，唔少人就聯想起英特爾收購McAfee，後果係點，大家有目共睹了。