美股向上，新股抽水潮湧現。最大規模IPO當然係Uber，據聞估值達900億美金。上星期，WeWork亦承認正安排上市，估值在200億美元之間。不過，如果以共享辦公室概念上市，市值可能高極有限。
WeWork發表首份《WeWork全球影響力報告》，企圖令大家明白，WeWork唔單係出租辦公室空間，亦係推動新經濟模式，推動行業創新及生態圈。
不過共享經濟，經營成本唔低之餘，競爭好大。WeWork市場商譽價值好高，竟然只有200億美元，結果同一家Splunk市值差唔多。如果大家出去調查，究竟Splunk做邊科生意，相信唔太多人講得出。但以軟件生意，截至2019年1月底，Splunk有成18億美金營業額，同WeWork差不多，可見利錢幾好。
Splunk做數據分析，市值上到200億。另一家亦會上市嘅Palantir，亦做大數據分析，估值竟高達400億美金，呢家公司更不見經傳，估值仲高過WeWork。據聞本港大數據專家車品覺，第一次拜訪Palantir，就碰咗個軟釘子。
Palantir名稱取自電影《魔戒》嘅預測水晶球，由曾創辦Paypal，美國著名右派Peter Thiel所創辦。Palantir以大數據作為監察及偵查工具，取得不少成功。據聞，美國國防部及中情局在伊拉克及阿富汗，都用Palantir作情報及反恐工作，整理從地局蒐集所得大量情報，甚至曾用嚟追捕拉登。美國衛生及公共服務部用Palantir作為偵察詐騙Medicare醫療福利，FBI用嚟查案，美國國土安全部用嚟檢查訪美旅客身份，美國移民及海關執法局（ICE）追查移民身份；3月Palantir亦獲得美國軍方合約，供應總值達8億美元情報系統；據報甚至有企業用Palantir監察內部員工，成功搵到向媒體泄密者。
大數據無所不知，Palantir仲勁過問水晶球。不過，美國總統選舉及英國脫歐公投，Cambridge Analytica事件曝光之後，大數據作政治活動或監察人民，正受廣泛質疑，認為侵犯隱私。唔單止有示威者到Palantir位於矽谷總部示威，美國有大學學生組織唔歡迎Palantir到校園舉行聘請會…
Palantir深受政府及警察部門嘅愛擁，就受維護隱私人士攻擊。去年底，Palantir贊助阿姆斯特丹隱私大會（Amsterdam Privacy Conference APC），引來大批學術界及維權人士抗議，結果甚為尷尬。
另一家SAS，亦係利用大數據作預測性分析，就未出現類似問題。
SAS創辦人Jim Goodnight經常強調，數據分析須用於正確用途。最近，SAS就公佈開發工具，幫助北卡羅來納州New Hanover縣嘅社會福利人員，以預測性分析保護兒童。New Hanover係全美受鴉片類藥物（Opioid）荼毒最深地區之一，唔少父母沉淪毒海，每月至少新增300宗兒童受虐或者忽略個案。SAS利用預測性分析，以AI技術協助社工篩選最高危個案，馬上跟進。
SAS亦係支持Data for Good運動嘅成員，強調以大數據作人道主義工具；SAS甚至推出咗流動應用GatherIQ，介紹如何應用數據行善，例如脫貧、減少饑荒，甚至推出多項教育計畫，幫助學童掌握大數據分析及編碼。近年Palantir亦有類似慈善工程，希望補救形像。
做科技，亦要有所不為，勿唯利是圖。