雲運算之中，以AWS發展最快，係人都知。另外SaaS亦唔弱。SaaS之中，又以Salesforce最強勁，去年底短暫見過122美元，現已上番160水平，走勢唔錯。
另一家表現唔錯，係叫Workday。Workday舊年11月見過底位124，就一直上升，目前已經係190附近。據市場消息，今年1月Workday再獲多家重要合約，新客戶包括Comcast、CapitalOne、Centene、Adecco。
Adecco係全球最大臨時僱員招聘公司之一，服務唔少IT企業，採用Workday亦有特別意義。全球多家臨時僱員招聘公司都面對人才流失，而勞工法例及聘員合約愈來愈複雜，加上本港有幾次司法案例，導致臨時僱員管理成本愈來愈高，另外僱員愈來愈知道如何保護權益，所以各家合約僱員招聘公司，經營更加困難。
今年鄉議局為香港求得中籤， 大家有不同解讀。剛去機場，原來EMC/DELL大中華區老頂Danny Tam亦去賭城SKO，渠話今年形勢比較嚴峻，香港出口已有下跌趨勢。
今年硬件銷售，除受經濟形勢影響，另外雲運算大幅上升，亦係硬件銷售隱憂。Tam Sir亦做過VMware老頂，自從上任香港老頂Charleston Sin，去咗MIT Hong Kong Innovation Node搞學術，最近終於繼任有人，就係原新意網旗下互聯優勢銷售及市務部高級副總裁藍建基，Franco Lan以前亦係EMC做咗十幾年，其實亦應該算係EMC舊人。
以現時環境，仍然係做軟件好過硬件，VMware與多家公有雲合作做生意，幾乎每個場合都見到VMware總裁Pat Gelsinger上台，即使話雲運算大行其道，相當亦唔影響VMware業績。