剛接Gartner報告，據初步統計結果顯示，2017年第二季，全球個人電腦付運量6,110萬台，較去年同期下跌4.3%，處於5年低谷。今年第二季度付運量更係自2007年以來最低。季度內，HP又取代聯想，重奪全球PC市場第一位。據Gartner數據，聯想及Apple付運量都有下跌，而HP及DELL都有增長。
不過即使重奪寶座，全球PC仍疲不能興，已係既成事實。HP積極開發其他不同格式PC，希望通常高增值產品，抵銷付運量下跌。
自從2008年金融危機以後，全球經濟陷入資產膨脹，實體經濟疲憊；加上經濟轉型，唔少行業飽受困擾。即使全球向數碼化轉型，但係PC銷情節節下跌，除咗經濟因素，亦係終端市場被取代。2016年Chromebook銷量增長達38%，不過基數仍然好細，不足以威脅PC，唔少PC功能可能逐漸被平板或者智能電話取代。
PC市場疲弱，對於英特爾而言當然唔係好事。雖然話X86架構在虛擬市場取代唔少不同運算功能，AI大潮流下，X86架構亦受NVIDIA等威脅，NVIDIA在GPU加速運算市場優勢擴大，尤其支援各種深度學習架構領先，NVIDIA股價一年間，已升超過三倍，市值朝一千億美元目標進發，英特爾市值只係一千六百億。從市值此消彼長，可見市場已確認，AI將改變一切。
AI飛入尋常百姓家距離有幾遠？近期網上陸續出現唔少在Raspberry pi上實作Tensorflow分享，除咗用Raspberry pi建立自動駕駛汽車，鏡頭可以辨認自訂街道或路牌改變行車方向，亦可以「訓練」Raspberry pi辨認四周事物，包括街上經過車輛；最有創意係安裝汽車上防止抄牌，鏡頭認出有無交通督導員車輛經過，馬上用Twilio發出訊息，如果呢個程式可引入香港，就相當唔錯。