JOS發表數碼轉型報告，JOS集團董事總經理Mark Lunt話，如果要知零售業嘅未來，可以到中國參觀。JOS旗下有唔少零售業客戶，當然特別注意呢方面發展。
如果講起零售業科技，不能不提騰訊。上星期騰訊技術夥伴Field Talent在科學園開展無人商店，雖然外表無好大驚喜，不過騰訊有唔少零售「深科技」，國內唔少零售業利用WeChat，開發出唔少應用，包括了可直接掃描商品，自行付款，完全毋須排隊付款。
上年，「家樂福」與騰訊合作，上海開咗首間無人超市「Le Marche」。部分「家樂福」亦可以用人臉識別付款，所以科學園所用人臉識別，國內已經正式使用，並不是實驗性質。騰訊與多家國際零售商合作，陸續有來。
騰訊WeChat用於流動支付，大家經習已為常。國內唔少WeChat小程序，可以用於即場掃描商品下單，消費者可在零售店掃描後馬上下單，然後直接送番屋企，即使店舖缺貨亦可以購買。
WeChat亦有小程序用於作智能酒店，可支付按金，通過人臉識別，馬上自動取得房間數碼鑰匙卡，憑數碼匙卡就直接入房，唔需要到前台排隊，入到房又可用WeChat，調節房間空調、開關窗簾及燈光，亦可叫餐及房間服務，當然可以登記住房積分，離開後亦可以WeChat取得發票報銷。
唔少零售商進入中國市場，當然為咗盈利，不過中國業務亦有另一個任務，就係作為零售技術實驗室。中國流動支付冠絕全球，而從中發展出唔同應用，從零售到酒店業，都可以帶來唔同體驗。「家樂福」就表明希望藉中國經驗，改善其他地區營運，為顧客帶來更好購物體驗。
不過，上述營運必須要利用WeChat之類平台，如果解決到保護私隱等難題，WeChat極有可能拓展到海外市場。