上星期，Cloud Expo Asia（CEA）終於完滿結束，主辦商已推銷下年5月22-23日CEA雲運算展覽。唔少展覽欄位已售出，不過從購買位置及銷情，可看到雲運算生意，並不是家家好景。
主會場售價不菲，比較好位置，叫價超過10萬美元。明年最中心位置VIP Lounge係由SAP購得，位置非常優越。SAP獲得唔少訂單，本身亦有Ariba、SuccessFactors、Hybris，聽中信國際電信CPC負責人講，唔少雲運算較大案子，都係SAP；因為HANA用戶，傾向利用雲運算方式部署。
門口位置則有阿里雲及華為等，而AWS則近門口，而內部仍有空位，預售情況比以往理想。Oracle則同Citic Telecom CPC做隔離鄰舍。Cloud Expo Asia同場亦有Data Centre World，銷情就相當一般。
但係雲保安就賣得唔錯，最大單位被B&Data預留，顯示保安廠商相當積極。
講起雲運算，不能不提Google。今個星期Google Cloud Platform（GCP）推出本地據點，現時全球35個國家及地區，累計超過100個服務據點。上星期，上周Google公佈原Oracle負責產品設計的Thomas Kurian，將替代Diane Greene，出任Google Cloud行政總裁。
Greene以共同創辦VMware而知名，後來擔任VMware行政總裁至2008年。2015年，Google以3億8千萬美元收購Greene創辦的Bebop，並邀請Greene出任Google Cloud，與Amazon的AWS及Microsoft的Azure競爭，但三年來缺乏成果，業務增長與競爭對手相距，愈來愈遠。
Greene也因以人工智慧技術協助美國國防部無人戰機，受到內部員工批評。不過，Google Cloud在企業市場陷入困境，可能係Greene無法續任的主要原因。唔少人批評Google對企業市場，仍係滿不在乎嘅態度。不少重要講座或技術會議，都睇唔到Google代表，一於係有麝自然香。
Kurian已經在Oracle工作廿二年，但Oracle雲業務亦唔比Google好多少，不過至少在企業市場經驗豐富。