國泰航空的保安事故後，不少企業紛紛加強合保安。羅兵咸永道（PwC）網絡安全和隱私團隊，承接本港唔少保安事故反應（Incident Response），與黑客周旋。唔少保安事故，可能並非上市公司或者不涉及客戶私隱，並未有公佈。
香港警務處報告指出，科技犯罪案件經濟損失在2012年至2016年5年期間，上升680%。而羅兵咸永道偵查個案亦激增五倍，顯示本港被黑客入侵個案，過去5年，上升咗5至6倍。
顏國定（KT Gan）負責PwC網絡安全和隱私團隊，現時KT團隊內有超過60名成員，KT話香港企業在網絡防禦水準上落後咗五年，又缺乏識別和修復網絡威脅和面對危機準備，香港企業好少做保安工夫。PwC生意應接不暇，不過保安事故反應要快，又要隔離攻擊，又要維持業務正常，分秒必爭，隨時幾晚通宵。
講番國泰泄密事件，每名用戶都收到幾多項資料被「不當取覽」。不過不當取覽，並不等被黑客入侵。國泰詳細列出每名用戶情況，邊項資料「被取覽」，唔似係入侵，反而似係設定權限出錯。國泰外判唔少IT工作，系統開發或測試過程，可能要開放系統予分判商測試，負責設定權限嘅系統人員又經驗不足，結果資料被外部人士取覽。
類似國泰一定有保安審計報告。有關設定如果錯誤，一旦被審計人員發現，幾乎一定要公佈，否則審計人員可能就「拒絕表示意見」。國泰發現錯誤後，仍要向審計交待，可能非刻意隱瞞。所有「被取覽」個人資料，亦未必已落入犯罪集團或黑客手中，但係如果真係權限設定錯誤，外間對於國泰保護客戶資料嘅能力，亦肯定大打折扣。
國泰曾係全球最優秀航空公司，近年飽受批評，燃油對沖失利後，然後又轉移系統時大亂，電話都打唔通；然後馬可孛羅會改制爭議，每次形象都受打擊。國泰似乎未能汲取教訓，猶記神級公關莊偉茵當年在位，形象工夫做到足。上次坐國泰新客機A350回港，新娛樂系統竟然仍未穩定，機組人員搞到一頭煙…
上星期，CITIC Telecom CPC技術部門從鰂魚涌喬遷至觀塘，擴充營業，並且發展AI及機器學習技術，其中包括以機器學習提供客戶服務，通過以往十幾年嘅數據，可預先估計客戶問題。客戶一致電服務部門，技術部門就已經預先估計客戶來電嘅原因。技術及創新總裁鄺偉基話，數據中心亦會用AR技術，維修人員可以更快確認器材，避免錯誤。
CITIC Telecom CPC服務周到，客戶取得唔少獎項。今年IDC數碼轉型大獎表揚透過數碼化產品/服務、資產、人員和貿易合作夥伴，轉變業務營運嘅卓越表現公司，其中CITIC Telecom CPC客戶TutorABC就獲得Operating Model Master。客戶成功，讚不絕口，一家公司先可叫做成功。