微軟帶領多家國際媒體，到訪美國西雅圖總部。今次唔止講技術，亦介紹新行政總裁Satya Nadella領導下，點樣改變咗管理文化。
到咗微軟總部，第一位踫面竟係微軟首席故事講解員（Chief Story Teller）Steve Clayton。以往科技公司有唔少職銜，好似Evangelist及Guru等等，中文好難翻譯，上述職銜算比較易譯。Clayton講微軟新管理文化，可以話絲絲入扣。
新管理文化之下，微軟更關心客戶，亦集中確保遵守共融、包含、文化差異等原則，甚至推動無障礙使用技術等，唔係只識集中推銷產品技術，亦更關心其他人，改變從內而外，從設計產品到管理哲學，完全一致。
呢啲課題响一般公司可能以為多餘，但微軟係國際公司，唔能夠解決上述問題，根本上唔可能稱為國際企業。有次遇到中信國際電信CPC老總Stephen Ho，在收購歐洲電信公司後，亦不約而同，提及中信國際電信CPC要發展成國際企業，先要照顧員工文化差異及共融性。
微軟又安排訪問當地工作嘅香港員工，亦異口同聲話，微軟比以往關心企業文化差異，包括少數族裔和女性的發言權及需要。
從講求共融（Inclusiveness）及照顧文化差異（Diversity），照顧弱勢社群及傷殘，關心社會和全球化問題。微軟嘅新文化之下，少咗自我膨脹，有更多聆聽及包容，亦設計出更合符客戶同社會整體要求產品。微軟強調產品共融能力，不同能力或有缺憾用戶，同樣都可享受產品，甚至研究產品應用，以促進社會改革和公益。
不少以往離開微軟員工，亦更願意重返微軟。據Clayton介紹，微軟改變咗企業文化，亦有助招聘，目前新聘用員工，近四分一都係以往舊同事，可見文化改變，吸引員工回巢。