上星期上海舉行世界人工智能大會，劉鶴現場讀出習近平賀詞；跟住附近杭州則舉行雲棲大會，內容有唔少AI/機械人內容，中國科技會議，可以話一個接一個。
商湯亮相世界人工智能大會，湯曉鷗教授亦主講。全球AI猛人匯集，除咗史丹福嘅李飛飛及吳恩達、微軟沈向洋、麻省理AI實驗室主任Daniela Rus，圖靈獎得主Raj Reddy、科大訊飛劉慶峰、帝國理工陸永青 ，BAT大咖李彦宏、馬雲、馬化騰，其他如雷軍、劉東強、雷軍等，可以話係科技大派對。
湯曉鷗亦出席全球高校人工智能學術聯盟成立；包括MIT、中文大學、上海交通大學、復旦、清華、中國科技大學、新加坡南洋理工、悉尼大學等學府參加，可見商湯在高等院校影響力，商湯同中文大學及MIT兩家大學關係深刻，亦分別設有實驗室。
科技部亦正式宣佈，依託商湯集團建設智慧視覺國家新一代人工智慧開放創新平台。商湯繼阿里雲、百度、騰訊、科大訊飛後，成為第五大國家人工智慧開放創新平台。商湯爭取成為新一代人工智慧開放創新平台，已有一段時間，今次終於得償素願，特首亦可能有背後發功。講起科大訊飛，會後有人爆料，話當日同聲傳譯示範造假，用傳譯員內容當成係AI，訊飛只在聽語音轉寫文字，即時傳譯仍要靠人。科大訊飛解釋，渠地唔識做即時傳譯，只不過轉寫文字，傳譯員聽得無咁辛苦。事實上，AI語音轉寫文字已經一向比人類凖確，其實無乜好示範，想唔到科大訊飛講得唔清唔楚，變成關公災難。國內科技企業市務及公關，一向水凖參差，離衝出國際，仍有一段距離。
講起MIT，VMware老總Charleston Sin離開後，就係去咗MIT HK Innovation Node做行政總監，VMware亦正搵人。Charleston行內出名人緣極佳，MIT深慶得人。MIT Innovation Node辦公室設在九龍塘達之路生產力大樓。香港接近南中國生產基地，MIT係全球頂尖研究工程和電腦科學研究學府，擁有林肯實驗室及媒體實驗室，近年AI實驗室亦鼎鼎有名，湯商唔少高層亦係校友。上述MIT人工智能實驗室主任Daniela Rus，亦係學術界有名。
聽聞前數碼港老總Herman Lam去咗思科，Barbara亦宣佈正式退休。Herman經驗豐富，今次重投IT，思科又添一員猛將。