較早前，同Macroview（高威電信）嘅科技總監PH Pang午飯，先知Macroview租用數碼港辦公室作為IT保安研究。Macroview從專注ICT整合，已變成集保安、基建、應用多方面方案供應商。不過，保安服務需求好大，北角總部無法容納，Macroview投資過千萬在升級保安技術，並擴展到數碼港。
講起Macroview，數本港技術能力最高整合商，相信一定入三甲。全公司有七百員工，約四百人有工程資格或背景，客戶都係全港最大企業及公營機構。Macroview在唔少科技項目整合水平，已經同國際公司睇齊。
大型科技公司進入園區，往往為咗尋求與初創互動；愈來愈多公司選擇到科學園或者數碼港。較早前，老牌科技公司Computime搬入科學園。唔少企業亦選擇以WeWork等共享空間，改善協作氣氛。唔少人以為，WeWork租戶主要以初創為主，其實唔少係大企業，連Microsoft都係WeWork租戶，可見現代辦公室氛圍及管理，幾咁重要。
早前見過WeWork大中華區艾鐵成，好多人對於WeWork作為一家共享辦公室，竟然幾百億美元估值，感到驚奇。艾鐵成就以城市化解釋WeWork成功因素，可說係近年聽到最好比喻。艾鐵成以中國城市化嚟解釋WeWork，渠話中國社會生活生平，可以快速提昇，同城市化關係好大；因為人口集中，就可興更多設備共享；例如醫院、教育、社區建議，減少人均使用成本。如果人口仍留在農村，難以短時期內興建大量設備，亦肯定有浪費。所以，城市化理念，就係共享。但係共享有時又會令用戶體驗下降；不過，設計可以改變行為，科技可以令共享更有效率。
首先WeWork以共享提高使用率，所有設施使用率都比傳統辦公室高好多，然後以設計增加會員互動，以科技令資源共享更有效使用，例如以App查詢同預訂設施，更加方便快捷。艾鐵成話，如果有運作方式，既可改善使用效率，同時又提昇用戶體驗，咁就一定成功。
唔少大企業進入園區，亦係在生態上尋求與初創擦出火花，但兩個園區在建築同設計，甚至設施管理，其實無乜考慮建立共同生態，甚至有啲唔方便，從用戶在群社投訴，甚至仲有不滿聲音，可見一斑；究竟點樣可以進一步改進用戶體驗，可能真係要請教WeWork。