上年，香港發展論壇邀請中國獨角獸，「美團點評」副總裁婁曉博，參加「跨世代談創科、創新、創業」分享會，談及美團點評在派送美食，形成鏈條式服務。單單就係美食外賣，在內地市場每年創造3至5萬億人民幣收入。婁曉博係香港人，曾任eBay及Amdoc高層，被派來港後，當年eBay以「易趣」打入內地，最終失敗。婁曉博重返中國加入大眾點評。
「美團點評」係國內三大獨角獸之一，已正式提交IPO申請，以600億美元估值，募集60億美元資金，為繼小米之後，今年香港規模第二大IPO。
送外賣估值600億美元，可能令人有啲意外，美團點評其實定位係科技公司，除了派送外賣技術，上星期宣佈無人配送開放平台，除已投入試運營的無人車「小袋」外，無人配送新款概念車及無人機亦首次亮相，以AI驅動，支援L4級無人駕駛。美團聯合創始人、高級副總裁王慧文，即場叫外賣咖啡。如果無人配送成事，中國肯定係全球首個機器人動配送外賣嘅國家。
「美團點評」獲騰訊投資，科技相當有睇頭。
另一家本港美食網站Openrice，亦正發展外賣功能。新任行政總裁邱桂雄係技術人，上星期中信國際電信CPC技術年會小組討論，話正研究開發支付閘道（Payment Gateway），發展廣告以外其他業務，包括為餐飯業提供增值服務，相信有唔少新發展。
另一家有潛力，可能成台灣獨角獸嘅沛星互動科技（Appier），亦係發展AI技術；最近甚至獲Sequoia Capital注資。
沛星宣佈，台灣清華大學電機工程學系孫民，加入沛星擔任首席人工智慧科學家（Chief AI Scientist）。孫民曾在史丹福及普林斯頓，追隨過吳恩達(Andrew Ng)、李飛飛及Silvio Savarese等AI大師；又曾在李飛飛主持嘅ImageNet圖像識別研究計畫，參與草創期系統設計，亦曾協助開發機器人作業系統（ROS）及微軟Kinect人體姿態辨識系統。