中美貿易大戰，美國其中一個理據，係中國竊取技術，或者強迫技術轉移；以成立合資企業，迫使外資轉移關鍵技術。
指中國竊取技術，公開話中國係竊賊，固然極大侮辱。究竟中國是否，或者實際從美國偷取咗幾多科技機密？一時難以求證。但美國呢種講法，就好似話你以前一窮二白，如今有錢，一定係從富翁處偷來。呢種講法，有如睇死人窮一世，唔可以發奮自立，當然激起民族憤慨。
美國科技企業無幾家附和，微軟甚至公開表示，中國經營環境良好。普遍美國人當然以為，科技企業攝於中國政府淫威，敢怒不敢言。
美國企業到中國開展業務；除咗市場，亦係為以中國作為生產，甚至研發基地。蘋果Steve Jobs有言在先，美國如具備足夠工程師，早就搬返去美國。同樣道理，Microsoft、IBM、Oracle等，亦係因為中國工程人材鼎盛，一早到中國開發研究。
美國仍執全球科技牛耳，早期研究可能從美國起步，實際技術開發落地，就東移印度中國，原因係本土缺乏工程人員，此乃分工結果。微軟亞洲研究院係本土以外，咪記最大基礎研究機構，此不無道理。最近IBM Research 推出Project Debater人工智能系統，可以同人類辯論，中國研究人員亦居功不少。
即使Google大量服務無法在華使用，TensorFlow開發仍然重返中國，因為TensorFlow乃開源項目，社區內中國技術人員，貢獻大量源碼，中國亦會會在AI有大量創新落地，必須鞏固TensorFlow及Google雲平台地位，亦係市場使然，非Google厚愛。
換言之，科技企業到中國，係為咗開發研究，如果唔技術轉移，又如何開發？呢個道理一字咁淺。美國指控中國，實際上係因為部分關鍵技術，好似5G及AI，中國已差不多同美國平手。
全球化之下，必須標準技術平台，趨向於開放，擴大市場。以往美國制定工業標準；時移世易，技術全球協作，中國亦有話語權，美國要取回制定標準權力，除非係鎖國。
Linux係由芬蘭人所開發，最終變為全球作業系統，甚至業界標準。技術以開源方式建立，促使技術成長更快；全球化促成科技成長，科技亦為全球化，帶來更大市場；美國科技公司係最大贏家。
貿易戰一旦向科技企業開刀，後果當然拖慢創新，美國科技企業亦難再在其他地區，搵到中國實力相當嘅研究基地。
結果亦係Steve Jobs講果一句：美國有足夠工程師，早就離開中國了。