上星期又繼續有收購活動，最大單可算博通（Broadcom）以190億美元收購CA，被稱為史上最「離奇」收購之一；外間對Broadcom收購意向，摸不著頭腦，Broadcom股價亦受壓。分析員嘅解讀，係Broadcom核心晶片業務開到荼蘼，藉收購想變身為軟件公司。
Broadcom上一次大型收購Brocade，亦係針對SDN軟件業務。Brocade唔少業務與客仔存在競爭關係，要出售或者結束，結果Brocade剛收購嘅Ruckus Wireless及ICX交換器，又要出售畀ARRIS，最近Brocade再次裁員1,100人。Brocade可話係SDN佈局最有遠見公司之一，曾積極開拓5G業務，出售後聲沉影寂。市場亦對於Broadcom拓展藍圖存有疑問，所以公佈收購後，股價應聲下跌。
Broadcom以乎係想「華麗轉身」（Pivot），從晶片轉成軟件公司。「華麗轉身」係初創名詞，意思係初創發現，手上生意似乎唔多掂，積極尋求出路，另闢蹊徑。唔少原本正做硬件科技公司，亦因為無利可圖，甚至被低價對手追上，亦積極轉身。即使成熟公司，無法扭轉客觀經營環境，紛紛轉身。
另一收購係英國Micro Focus出售SUSE Linux予瑞典私募基金EQT Partners，作價超過25億美金。唔少人都識得RedHat Linux，上述呢家曾被Novell收購嘅SUSE Linux，較少人記得。其實，SUSE亦有捧場客，最大一家叫SAP；唔少SAP HANA係採用SUSE Linux企業版本。自從2011年，SAP及SUSE合作優化HANA在SUSE上表現。但以市值計，RedHat已達到250億美金，剛好係SUSE嘅10倍。
講起RedHat，上星期訪問中文大學深圳眾創中心，終於遇見NXROBO（創想未來機器人）創辦人林天麟博士。林天麟係深圳副校長，國際機械人專家徐揚生教授嘅高足，機械人界早已鼎鼎有名，中大從學士讀到博士，足足9年，設計過會爬樹機器人、全方位四輪轉向車等經典作品。
林天麟發現，每次開發機械人，都要做唔少重複開發。如果要加速開發，就須要有共開共通平台及工具，站在巨人肩膀上，結果選擇做巨人，創業自行開發機械人作業系統（OS）。NXROBO亦支援史丹福AI實驗室開發咗開源嘅Robot Operating System（ROS），減少開發者唔少重複動作。雖然話，ROS嚴格上並不算係OS，主要係在Linux上運行（亦可用Raspberry Pi），只算係「中間件」，但係面向機器人控制前端，稱之為OS比較易明白。美國界著名機械人開發公司Boston Dynamics，亦係利用ROS開發，唔少專業及業餘開發者採用。
NXROBO業務亦包括為ROS技術支援，甚至ROS上增加增值模塊，加上類似程式庫之類，提供共用元件；如偵察環境及感知、移動網絡支援等等。NXROBO亦提供ROS訓練及教育服務；上述業務似足RedHat為Linux提供服務，林天麟話NXROBO可以話係機械人界嘅RedHat。
唔少人可能以為，選擇做平台野心過大；事實上可發揮影響力亦更大。中國製造2025必須要開發大量機械人，NXROBO支援開源ROS社區，更多人更易加入機器人編程行業。當機器人要企業級功能及支援，NXROBO客戶必然愈來愈多。林天麟創業之地深圳，中國開發機械人高手雲集，更易擴大市場，打響名堂。NXROBO如果做機械人硬件，估值可能有限；但作為軟件公司，一待時機成熟，更多人採用；NXROBO嘅估值，可能一鳴驚人。