講創科城市，深圳已名揚國際。上星期，深圳舉行第三屆CCF-GAIR 2018全球人工智能與機器人峰會。此會議稱之為「全球」，講者不乏業界權威；過去兩年包括廿餘位中美院士，廿多位IEEE的Fellow，今年陣容更鼎盛。
今年講者有全球最頂尖機器人研究員Pieter Abbeel，Abbeel為美國加大柏克萊分校教授，曾加入Elon Musk成立嘅OpenAI，其後創辦covariant.ai ，教導機器人學習即使無人類控制下，自行學習完成任務。Covariant嘅秘訣，就係深度學習中嘅「強化學習」（Reinforcement Learning），AI算法通過反覆嘗試及錯誤（trial and error），模型可自行學習掌握技巧，唔再需要預先編程。
DeepMind開發Alpha Zero，就係以強化學習，教電腦自己同自己下圍棋，結果愈下愈高段數，終於打敗世界冠軍。Covariant開業已獲Amplify Partners投資七百萬美金，再後三星屬下「Samsung NEXT」創投基金Q Fund加碼投資。
此外，CCF-GAIR又有圖靈獎（Turing Award）獲獎者，史丹福大學榮休教授高德納（Donald Knuth）演講。高德納著作《The Art of Computer Programming》有唔少中國讀者，係極罕有博學通才，作數學家之餘，兼作家及程式員；寫作夜以繼日，速度極快。
「高德納」呢個中文名，乃前城大電腦科學系系主任儲楓所起。儲楓丈夫就係中大講座教授姚期智教授，亦係2000年圖靈獎得主，以「極小極大定理」證明了現稱「姚氏原理」理論。姚教授亦係量子計算權威，兼研究人工智能。姚教授預言：量子計算和人工智能結合一起，我們可能比大自然更聰明。最近，清華發表量子糾缠接口已達廿五個，數量比原先紀錄保持者，美國CIT多出6倍；對於中國未來發展量子網絡，有重大意義。不過量子運算要取代GPU訓練AI深度學習模型，相信仍有一段長時間。
今次CCF-GAIR係中大深圳承辦，當然唔少得中大產生嘅AI獨角獸商湯。商湯聯合創始人、中文大學- 商湯科技聯合實驗室主任林達華教授亦主講。林教授係在中大讀碩士，然後獲全數獎學金赴MIT取得博士，再返中大任教，曾研發商湯人臉識別技術。中大深圳首任校長徐揚生教授，則係機器人及自動控制專家，曾經任教美國電算最頂尖Carnegie Mellon，亦高人也。