歐洲實行GDPR，坊間唔少討論，其中以私隱問題最多。GDPR被唔少人認為，係保障個人私隱最清晰立法，唔少地區會追隨。不過企業會唔會無意之間，保存唔應該保存私人資料？又或者無意之間外泄資料？因此誤墮法網？
企業遭入侵，同樣導致觸犯法例。所以每次呢類立法，IT保安就有生意可做，企業要花一大筆更新系統，部分可能選擇減少持有個人資料，減低風險。但即使要減持個人資料，亦要系統幫手，企業持有過期客戶或員工資料，忘記刪除，又係犯法，必須系統自動管理，減少風險。
多國政府先後就數據主權立法，最明顯係中國《網絡安全法》，有人以為係保護私隱，亦有人指保護經濟發展。坊間一直有講法，數據係未來石油，立法就係留住資源在本國或地區，或者保障不被其他國家利用，亦係國家利益行為。
外國對中國《網絡安全法》，增加跨國公司經營成本，給予中國企業不公平競爭優勢，一向唔少意見；尤其要求「關鍵信息基礎設施」運營商在中國境內儲存信息和商業數據。《網絡安全法》表面係為國家安全，實際為保障經濟利益，唔俾數據容易被外國利用。
美國指中國政府迫使外國企業技術轉移，中國係不少科技企業研究開發中心，科技行業要投資一地，幾乎必須培養人材，當中肯定有技術轉移。中國立法限制數據轉移及儲存，更令外國企業頭痛。
香港未就有關數據立法，但唔少金融業遵守數據主權，要求數據存在區內。各國網絡空間要保護本身資源，短兵相接，美國係全球最大技術強國，最受影響。全球應用走向雲服務變成SaaS。結果所有SaaS，為支援中國儲存用戶嘅數據，要同國內雲服務商合作，投訴中國有不公平競爭。
對於全球化雲運算經營業者，又須到更多不同地區，建立數據中心，全球數據中心業務，需求又有增無減。本港亦有唔少數據中心，部分位於工業邨，仍然供不應求。香港政府可能為部分營運商，提供優專條款甚至土地；原因係數據中心帶來界外效益，甚至科技紅利。但遲來嘅或外國數據中心業者，又會以不公平競爭而投訴。
其實，世界真的有公平嗎？