明日世界盃開鑼，首場賽事係主場俄羅斯對沙地。球迷為觀看世界盃賽事，可謂無所不用其極，阿里旗下嘅優酷，上月底宣佈獲得64場世界盃串流直播權，唔少球迷馬上為張羅VPN駁返大陸頭痕。
國內球迷眾多，優酷成《優愛騰》三家中，唯一獲直播嘅串流平台，未來阿里串流平台技術，肯定成為阿里雲戲碼之一。
自從阿里收購優酷之後，整合CDN加速服務，目前全球有成1300多個節點，以全球整體佈局，阿里CDN已經同Akamai及AWS相差無幾，而國內則覆蓋34個區域，超過一千個節點可作加速直播。講返串流直播，好多人都知，本港初創天開數碼媒體（TFI）相當犀利，開發視頻專利技術，視頻轉碼速度超快，唔少國內同埋香港體育直播，其實都係緊天開技術。
較早前，阿里亦同科學園AI初創商湯，創立AI實驗室。上星期，阿里在上海搞雲棲大會，推出ET農業大腦，以AI助農民種菜養豬。其實，唔少國家農民都開始利用AI，較早前吳恩達介紹，美國史丹福大學有AI種生菜以外，日本農民亦開發AI嚟楝黃瓜，今年Google I/O大會上有介紹菜農用TensorFlow，建立黃瓜自動分棟系統，拍攝黃瓜後，圖片先上傳到Raspberry Pi先作辨認，再上傳Google Cloud神經網絡進一步分析，按顏色及大細，棟成不同品質及級別，慳番唔少人手。
同樣技術，可用於監察任何農作物及，以視頻分析，建立不同AI模型，優化農作物生長，作為分類及改善生長環境。中國農產品市場開放，現代化農業更刻不容緩。IOT加上AI，改變未來農業面貌。