香港工程缺乏人才，商界數碼化轉型，行不得也哥哥。各大學理學院及工程學院又有收生困難，有講法係新學制下，不能同時選修Physics、Chemistry、Biology三科，知識天殘地缺。但即使同學成績好，多亦不以工程或理科首選。中國大陸投入科普教育資源唔少，先能培養大批出色工程師。
政府力推STEM，香港亦有批「死士」，多年來傾力推動中學科普教育，順德聯誼總會胡兆熾中學廖萬里校長，剛帶領大中華隊赴歐洲羅馬尼亞InfoMatrix大賽，贏得好成績。廖校長以前任順德聯誼總會翁祐中學副校長，該校科技亦多次獲得好成績。廖校長話，參與比賽或發明學生，成績可能唔算最好，但肯定科技最有熱誠，學生在國際比賽或者發明方面有天賦，大學可唔可以破格取錄？
廖校長話，曾經有學生發明具商業價值，後來竟申請專利及供廠商投產，對學生嚟講好有鼓舞作用。
大學為收生扭盡六壬，甚至開辦暑期進修班，吸引中學生報讀工程理科。科大就有中學／大學雙修課程（Dual Program），專門針對資優學生，大學導師授課，最近有中學生修畢後，跳班進入科大。聽聞其他大學密鑼緊鼓，相信類似課程陸續有嚟。中學階段接受大學教育，跳跳出框框，可能係大勢所趨。
類似大學開放給予中學生就讀，甚至使用實驗室設施，2015年歐洲挪威城市Espoo及Aalto大學率先實行，大學向中學提供教育方法學、教學科技、服務平台，學校可以更靈活及具擴充能力，中學甚至搬入大學校園，共享設施。2016年，Espoo市以「學校即服務」（School as a Service）贏得國際質素創新大獎。Espoo市又建立KYKY平台，初創與學校攜手，加快創新過程，開放產品畀學校試用及給予意見，學生又亦可從初創公司獲靈感，優化產品。Espoo市獲聯合國教科文組織封為「學習城市」，成全球教育創新朝聖地。
本港KYKY平台翻版，可數較早前，香港科學園初創Platysens向喇沙提供游泳穿戴式監察儀，協助喇沙泳隊訓練，並協助提供數據意見改善設計，據講唔少同學使用後，亦得到唔少啟發，研究IOT及無線傳輸技術。
似乎推動科技創新前，先要搞好教育創新；否則只係緣木求魚。