上星期，中興被美國商務部宣佈制裁中興，整個中興業務馬上停頓，而美國向中興出售設備廠商股價亦大跌。中興所有主要技術來自美國，美國公司唔出售芯片及設備，中興業務馬上「休克」。
中興係全國最大國有控股通訊設備上市公司，又係軍工系統航天科工集團子公司，牽連更廣。
網上流傳一篇文章《被自家律師送上「槍口」的「二流」中興》，讀之令人噴飯，據講，中興被一位曾任法律顧問嘅猶太裔律師Ashley Kyle Yablon所舉報，伊朗又同以色列係死敵，呢位律師又可能相當愛國，全盤資料被掌握，後又傳出中興高層出國，電腦內竟有機密文件，亦被美國截獲，繪影繪聲；如果屬實，證據確鑿，加上今次制裁無任何上訴機制，瓜多過菜。
美國針對中國科技企業調查，已非首次。中興事件後，華為否認被美國政府再次調查，就朝鮮、伊朗、叙利亞、古巴、蘇丹出口提供訊息。但美國國會「美中經濟安全審查委員會報告」就指出，中國政府可能支持某些企業進行間諜活動，點名華為、中興、聯想三家企業。據講，華為高層亦甚擔心受事件波及。不過，美國政府查咗幾年，雖然搵唔到證據，華為入美國市場依然障礙重重。
不過，內地亦流傳一篇華為老總任正非《與2012實驗室座談會紀要》，六年前就預計咗中興事件，亦解釋華為致力開發芯片，大量投資麒麟芯片及其他基礎技術。從任正非一席話，可見深謀遠慮。
上星期中移動旺角旗艦店開幕，行政總裁李帆風亦被問到有關中興事件，有無影響中移動。李帆風話中移動香港無用中興，所以並無影響。香港運營商唔少採用華為，即使部分大企業及銀行亦開始使用。但係國內科技公司要香港行業接受，過程亦相當唔容易。
講起國內科技，最有可能超越美國，可能係人工智能AI。今日，本地獨角獸商湯，首次在北京舉行人工智能AI峰會，用戶人臉登記，去到人臉識別入場。商湯人臉識別準確度，誤差率少於億分之一，入場望望鏡頭就掂了。