上星期，Bitcoin又再大幅抽高，美息趨升，國際貨幣市場動蕩，港元甚至觸及弱方保證。唔少對沖基金開始投資Bitcoin，加上又有期貨市場，升值可能係市場操作，亦可能係實際需求帶動。單從匯率動向聯想，市場正沽出區內資產，可能以Bitcoin轉移資產，係升值背後原因之一。唯一肯定，似乎中國政府打擊Bitcoin仍未奏效，依然愈升愈有。
海外唔少Bitcoin礦場，亦係中國人所投資，Bitcoin無息收，主要用於投資升值或者支付用途。中國資產價格高企，中國唔少人亦想出外投資，Bitcoin成為資產轉移工具。
中國政府表明會維持人民幣強勢，杜絕以Bitcoin炒貨幣貶值，但國內資產價格水平偏高，唔少投資正伺機套現，轉投國外資產。Bitcoin交易保密，好難知買家身分。Bitcoin供應彈性低（無可能短期內大量增加，貨源又歸邊）少數需求足以推高價格。香港有多個Bitcoin交易平台做OTC（即係將Bitcoin兌換成其他貨幣），包括較早前開業Circle Trade，已經成為最活躍交易地區，唔少買賣亦針對國內投資者。
中國致力打擊Bitcoin，包括OTC交易及礦場。但市場對於Bitcoin需求好大，即使礦場不在境內，仍有辦法供應投資者。香港金管局一直認為，Bitcoin不存在貨幣功能，所以不受金管局監管。而Bitcoin一旦納入監管，就等於承認Bitcoin法定地位，投資者信心反而大增。業內人士可能希望有監管，以便市場正常發展。
美國已經開始有監管Bitcoin機制，預計歐盟亦納入監管虛擬貨幣以反洗黑錢，迫令披露交易身分及報告可疑交易。美國監管當局認為，Bitcoin唔係貨幣，係類似黃金等商品。Bitcoin既無發行機構，供應量受限制，不可能作為一種貨幣。不過，Bitcoin快速轉讓，而且相當安全，作為跨境支付，比其他商品更方便，加上已有期貨市場，具備作為支付工具一切條件；唯一問題係價格波幅好大，如果用於交易，就一定要期貨作對沖，否則要食定驚風散。