雖然話Bitcoin大跌，專門生產Bitcoin採礦機器嘉楠耘智（Canaan Creative）仍計畫香港上市。據風險基金點亮資本合夥人勞維信博士話，未來投資重點，依然係AI及區塊鏈。Bitcoin只係區塊鏈應用之一，未來發展不可限量。
AI更係全城熱話。勞博士話，香港可投AI項目有限，首隻獨角獸商湯入場費極貴，正係尋找其他投資機會。有悲觀論者認為，AI係「赢者通吃，弱肉強食」遊戲。不過坊間亦有唔同意見。
AI應用於唔同範圍，曾領導Google及百度AI團隊嘅吳恩達（Andrew Ng），曾在史丹福大學任教。Andrew Ng一次演講提及，AI須用大量數據訓練，似乎對於大企業有利，但並非所有數據都由大企業掌握。渠提及有史丹福學生，經常到菜田拍攝生菜生長，然後返回大學訓練AI演算法。原來生菜施肥料之前，要先清除部分菜苗，騰出適當間距，每株菜苗有足夠空間生長。利用菜田圖片訓練AI後，用鏡頭可即時知道每塊田，要移除幾多株菜苗，自動計算每株菜苗最佳間距，甚至分辨菜苗生長狀態，再用機器自動移除。目前，全美國一成生菜用同樣方法種植，減少好多人手。
呢家Blue River初創，已開始用相同技術，應用棉花種植。Andrew Ng話，好少企業會察覺，點樣為生菜種植，訓練AI演算法，呢個深度學習演算愈來愈成熟，Blue River亦好難被大企業取代，生意亦有競爭空間。
香港亦有類似概念，最出名係林順潮醫生創立希瑪眼科，與騰訊合作以人工智能（AI）「騰訊覓影」應用在希瑪眼科診斷，以手機收集眼科數據，希瑪眼科可用AI加快斷症。
上星期，2018香港資訊及通訊科技獎頒獎，另一家「Find Solution AI」，用AI分析小朋友情緒變化，幫助改善學業成績，並識別患有自閉症或讀寫障礙兒童。近年全球自閉症病發率上升，小朋友用平板電腦愈來愈多，「Find Solution AI」亦係從平板鏡頭，趁小朋友做試題時，即時蒐集數據。創辦「Find Solution AI」林苑莉長子亦有自閉症，激發咗有關研究。
今月廿五日，商湯北京舉行第一屆人工智能大會，CEO徐立及創辦人湯曉鷗教授發表演講，已有過千人參加；商湯已經走出人臉識別，進軍其他AI領域；外界盛傳商湯年內上市。阿里上年入股後，商湯估值升至三十億美元。中國以開發人工智能訂為國策，加上商湯在國際打響品牌，估值有上調空間。另一家知名AI公司北京曠視，估值達十四億美金，估計明年上市。