上星期六，喇沙小學舉行開放日，校長黎月兒（Chandni Nair Rakesh）招待傳媒訪問。喇沙一向以音樂及運動揚威學界，當日亦見到前財爺John Tsang。喇沙一向人才輩出，畢業生有不少任職科技高層，又對學校非常有感情。黎校長認為，新一代系Digital Native，致力發展STEM，雖然唔少學校在STEM運用得成功，但喇沙運用科技作教育，簡直眼界大開，唔單止學生可以互動參與，學習過程更有趣，啟發思維，亦結合咗同科目內容，甚至學校歷史同承傳。
首先，喇沙開放日利用流動App，介紹校內60個不同景點及歷史典故。黎校長話，唔少舊生亦未必完全記得校內地點典故，而60周年App用咗iBeacon定位，非常準確，參觀者到唔同景點（甚至有介紹李小龍事蹟），甚至可以蒐集電子印章，集齊就可以換禮物。呢個App亦可以作室內導航，參觀者可以用手機行勻全校，唔會迷失。
黎校長亦介紹校內新設Wow房及IoT房，Wow房畀學生透過創作認識科技，可以3D打印及用Lego積木，創作唔同藝術作品。IoT房更加有趣，利用littleBits電子模組，組合不同IoT作品，甚至裝作樂器自行演奏，亦有同學用IFTTT協定，為IoT製作自動流程，發個訊息就可啟動設備。校長話，同學仔4年級大概就識用Scratch語言，控制Arduino等作不同用途。Scratch語言係由麻省理工發表，專門俾7-16歲小朋友學習編程。
學生用IoT做出電子Perfect襟章，相當鬼馬。另外值得一提係喇沙小學用唔少AR技術，為書本加入多媒體，尤其係天主教組織喇沙會的創辦人聖若翰·喇沙事蹟，又用VR介紹喇沙小學小教堂內文物歷史。雖然話，講起嚟上述都係高科技，不過其實唔少係用免費工具或者開源工具完成。如果有人話香港創新無前途，首先去喇沙小學觀摩下。
話說回頭，喇沙小學不單授業解惑，亦畀咗唔少學生快樂童年回憶。唔怪得舊生咁有感情。