上星期，Mastercard與HKTaxi宣佈合作當日，恰好消費會又公佈各個Call的士App排名，其中以HKTaxi最可靠，約車成功率最高。香港的士受網約車競爭，今次合作，時機配合得相當好。
Mastercard以大手筆推出In-App電子付款功能，請森美及小儀擔任司儀， Mastercard香港及澳門總經理陳一芳，特別講出自己用呢個In-App電子付款，陳小姐話有次夜晚為位女同事叫的士，當同事到達家門，司機大佬輸入收費總數，渠馬上知道同事已經平安回家，亦知道送呢位同事嘅司機大佬身份，事後賬單亦自動寄到電郵戶口，如果係公費，仲可自動報銷。
陳小姐講中好多女士心思；深宵回家，女士選擇坐Uber，唔少係安全理由。所以用APP叫車可確定司機身份。雖然話，其他支付技術亦進攻的士市場，但確定司機身份係一大優點。
其次係上到車，點知司機大佬，有無安裝支付寶或微信支付？如果要裝額外設備，就更難普及。用HKTaxi叫車，從預訂開始，就可肯定一定收卡，無須到上車先至知要畀現金。
不過，即使男士亦有動機用In-App電子付款，夜晚唔少飲大咗，落的士時五百蚊紙當一百蚊，大有人在。如果係用App叫車，肯定唔會畀錯錢找錯數。
唔少支付方案進軍的士業，至今成效一般；操作麻煩亦係問題，司機要打開支付平台，輸入銀碼，再掃描乘客手機QR Code，In-App電子付款就只要司機輸入銀碼，就可以馬上支付，相對亦較方便；今次Mastercard合作，可望帶來突破。