今月初，央視財經台訪問Hanson Robotics開發嘅機械人Sophia（國內譯做索菲亞），索菲亞一夜走紅；雖然索菲亞只識英文對答，唔少人已嘖嘖稱奇；索菲亞又獲得沙地阿拉伯公民資格，唔知幾時會攞香港三粒星，因為索菲亞係香港出世，亦係香港科學園租戶，開發索菲亞嘅創科亦以香港為基地，仲係培育計畫成員。唔少傳媒想訪問下索菲亞，至少搵創辦人David Hanson博士傾下。
不論索菲亞有幾多實用價值，索菲亞係接受最多傳媒訪問嘅機械人，則幾乎可以肯定。Hanson Robotics作為香港公司，又開發AI機械人，夠資格做本港創科宣傳大使。
Hanson Robotics原本設於美國，開始時係參加美國迪士尼創業加速計畫。2013年創辦人David Hanson決定搬總部到香港，舊年獲得香港投資推廣處StartmeupHK Venture大獎。據Hanson博士解釋，Hanson Robotics係睇中香港有玩具業製造傳統，可將索菲亞做到栩栩如生並降低成本，決定移師香港。
雖然媒體暫時追訪唔到索菲亞。本星期六，香港科學園舉行Sónar+D電子音樂節，Sophia（索菲亞）出席做特別嘉賓，相信迫爆玻璃，索菲亞號稱最美麗機械人，大家可以一睹Sophia芳容。
上星期，長和同埋螞蟻金服合資旗下電子錢包支付寶香港（Alipay HK）啟動，據講用戶人數突破百萬，長和系零售業及基建擁龐大網絡，兩者有互補作用，幾乎可肯定支付寶香港，用量直線上升。
唔少話本港無現金支付落後；其實正因八達通無現金支付太方便，支付寶香港要改變購物習慣，必須靠大量獎賞，可以想像會大發福利。支付寶呢盤生意大有可為，從中可獲得寶貴資料，開發FinTech好有利。不過，類似支付寶同埋微信支付，下下要啟動手機，對於講求速度嘅香港人，長遠未必容易受落。
較早前八達通就夥拍香港街市集團，馬鞍山恆安邨恆安市場推出八達通服務，街市接受八達通卡或八達通App O!ePay二維碼付款，上周三八婦女節，一連8日「$8 餸大禮」。 不過O!ePay究竟有幾多活躍用戶？一直未見公佈。