今日財爺公佈預算案，唔少得多項政策，推動香港成為創新之都。本港面臨多項挑戰，包括咗人口老化、長期病患增加、勞動力不足等長期問題
上星期科學園春茗，行政總裁Albert Wong講到發展生物科技、機器人技術、人工智能技術，其中人工智能叫AI+，真係可圈可點，因為AI可以應用在唔同行業，包括生物醫療。
自從林順潮醫生嘅希瑪上市爆紅，投資界對生物醫療無限憧憬。香港科學園內有多家生物科技創科，最出名當然係中大盧煜明教授從事血DNA研究，但係亦有唔少後進，一家叫博腦BrainNow通過AI技術，為腦退化或柏金遜等作早期腦部診斷。本港缺乏放射科醫生，可以靠AI幫手減輕人力需求，科學園亦有好幾家同樣企業，包括AI診斷癌症嘅視見醫療Imsight Medical Technology，以AI作癌症診斷，兩家聯想係有份投資。
最近港大研究，以特定頻率光波刺激大腦海馬體，有助提升大腦皮層活動或助醫治認知障礙，但研究仍初期階段。腦退化發展緩慢，一旦發生無得逆轉。早期診斷可改變生活習慣，部分藥物亦可改善。市場上有隻叫Souvenaid，助早期腦化退改善記憶，病向淺中醫。
眼底技術亦可作早期診斷，掃描眼底價格較低，中大醫學院助理院長徐仲鍈兩年前創辦了Health View Bioanalytic，自動分析中風風險，亦適用於糖尿病和認知障礙症評估。另一家瞳訊醫療Visiona則以人工智能，透過眼底攝影機拍攝視網膜影像，檢測糖尿病視網膜病變。
科學園科技創業培育計畫主管Peter Mok話，除咗機器人研究，包括減低建築業所用人手，甚至有建築物料嘅研究。