香港交易所公布《主板規則》新增兩個章節，允許未盈利、未有收入生物科技發行人，以及不同投票權架構的新興及創新産業發行人，作出額外披露及制定保障措施後在主板上市。
同股不同權，討論已久，但係交易所特別提及生物科技，顯示全球生物科技市場熱烙，大有可為，交易所高層亦飛去三藩市Healthcare Conference宣傳生化初創來港上市。美國有唔少生化技術，有潛力來港上市，中國大陸有潛力者亦唔少。
其實本地薑亦唔弱，科學園內有數家更有明星級，首先要提中大盧煜明教授，有份創立嘅三間生物科技公司；包括雅士能（Xcelom），可早期檢測肺癌嘅Sanomics，以及思為諾（Cirina）。舊年Cirina又同騰訊、Bill Gates、Jeff Bezos等加上多家大藥廠及醫學器材廠合作投資嘅GRAIL合併。GRAIL舊年B輪再集資12億美金，共集資13億美金，值幾錢可估到。
盧教授獲頒國內「未來科學大獎」中的「生命科學獎」100萬美元獎金，表揚渠在產前無創檢查胎兒基因貢獻，渠在癌症預測研究，亦深受國際推崇，傳言有機會獲諾貝爾獎。
前科大于常海教授創立海康生命科技，同樣位於科學園。海康係最早開發「Lab-on-a-chip」 (LOAC)技術嘅生物科技公司。當年于教授放棄史丹福大學高級教席，返科大教書，1999年創立海康，請唔少科大畢業生，目前在體外診斷(In Vitro Diagnostic，IVD )市場內好有名氣。近年全球有關「照護現場 (POC) 分子診斷」（Molecular Point of Care Diagnostic Tests）研究愈來愈多，分子診斷通過以特殊晶片；測試受感染者體內基因，快速現場測定病源，唔單可快速在患者附近檢驗獲得結果，亦可在醫院嘅ICU/CCU 、診療所，門診，地區醫療點做快速檢驗，照護現場 (POC) 分子診斷正推動IVD器材市場快速成長。海康IVD器材可應用在測試傳染病菌、食物敏感、甚至獸醫、水產、農場內家离畜產動物，快速以分子檢測診斷疾病；應用範圍廣泛。
以AI輔助醫學影像診斷分析亦屬熱門，中大王平安教授及中大博士生陳浩嘅視見醫療，較早前已集團二千萬元人民幣，與陳浩同一實驗室內，又有石林教授所創辦博腦醫療科技，亦係位於科學園，以醫療影像技術，預測腦退化等問題。據聞生物科技係現屆政府力推項目，預算案快要公佈，不妨拭目以待。