踏入2018年，金融業回暖，息口差距有望擴大，有利重振銀行業，啟動重新投資，銀行業亦會加快金融科技發展，開拓新收費來源。今年九月份，金融管理局有望推出「快速支付系統」（Faster Payment System，FPS），本地儲值卡及銀行等過數更快趣，跨境支付更直接，香港可與任何符合ISO 20022標準支付系統地區，進行互相快速支付，唔再須要用SWIFT。
目前跨境匯款，仍然以SWIFT為主。長遠而言，大家可能唔再用SWIFT傳送匯款信息。近年銀行已因SWIFT傳送信息量有限，部分匯款兩張SWIFT先夠。
香港金融業外匯交投全球第四位，金融業佔全港GDP達16%，SWIFT處理量亦係亞洲之冠。FPS出現後，過數可即刻完成。銀行業人士以為，消費者仍會比較喜觀信用卡，因為可遲啲找數。但商業活動，就可能就傾向於採用FPS，特別係唔少內地戶口，利用香港作為收款或支付窗口，ISO 20022可減低國內公司做生意成本。
ISO 20022在歐洲地區唔少國家已經通用，區內如新加坡、泰國等，亦已推出ISO 20022跨境支付，ISO 20022以XML技術為主，處理信息量更多，可用埋中文等東南亞語言，中國銀行香港到內地結算通道，就係用緊ISO 20022傳送匯款信息，FPS更有效知道資金詳細內容，有效打擊洗錢活動；支付亦可以同公司內部系統對接，馬上結算，知道邊張單已經找咗數。
換言之，ISO 20022對消費者支付，短期影響可能唔大，對貿易及旅遊業等，經常做跨境支付，就可能好有幫助，而且支付模式統一，直接通過FPS畀錢，更快捷安全，減低成本。
IT行業機遇；亦可能要靠人工智能及物聯網支持。過去幾年，私營部門IT投資增長唔大，可能要靠公營投資，或者新興行業，先可維持銷售。本港有多家公營部門、運輸業、甚至機場，據聞大地瓜已獲鐵路系統破席，I記亦獲某本地物流業，以新Power處理器預測天氣。
政府推智慧城市，唔少IT廠商亦引頸以待，特別係網絡設備製造商，政府可能大規模更新設備，並開放數據，啟動更多商機。總之今年好過舊年，幾乎可以肯定。