剛聞咪記公關大員Alice Li離職，有啲驚訝。Alice已在Microsoft任職10年，側聞下一份工已離開IT界，咪記只係聘請較低職位代替，待遇同總監當然有差別。Alice曾經任數碼通及蜆殼石油，後來加入咪記，一路升到總監位置，熟悉本港IT傳媒。
近年IT界人事唔少變動。近代人事管理，或者叫人力資本管理，唔少以Balanced Scorecard之類KPI評核制度，員工追求KPI，有時於疲於奔命，咪記亦係以系統落實KPI嘅著名機構。聽過唔少IT機構，員工講起KPI壓力，寧願加入人事管理壓力較低公司。
講起人事管理系統，近期計錯薪酬事件就愈來愈多；唔少公司以合約形式聘用僱員，甚至外判予合約管理公司。唔少合約制員工，薪金之中，又有唔少係佣金；以多勞多得。但合約員工薪醒管理，可以非常複雜，每周返工多少小時，亦影響薪酬福利；源於終審法院一宗勞資個案裁決；因為《僱傭條例》內有關疾病津貼、產假薪酬、代通知金及年終酬金條文，與假日薪酬和年假薪酬條文相似，政府根據判例，2007年７月１３日修訂咗《僱傭條例》，確保『可行計算方法』，計算法定權益，換言之，疾病津貼、產假薪酬、代通知金及年終酬金，以平均工資計。
但唔少公司後來出糧，並無根據７１３條例相應修改，咁就就大鑊了。近期有必勝客道歉承諾補發，向2007年起員工補發假期工資，就係因為忽略咗７１３條例。而員工亦愈來愈精明，唔少人只用無薪假，有薪假則以７１３計算。合約員工以月或者周計算，７１３條例極為複雜，幾乎難以用人手計，必須用系統或複雜試算表做，又極容易出錯。佣金高既員工，產假以平均工資計，如果放產假前又好好佣金，結果產假期計薪總數，可能甚為驚人。人事法例愈來愈複雜，唔少企業誤墮法網，７１３又具追溯力，唔少人事部門只有計餐死。最近政府本身都出錯糧，可見做人事系統一個唔小心，好容易話陷阱重重。
唔少IT公司，都係以合約員工為主，主要減輕人事部門工作量，部分公司甚至經理級都係以合約形式聘用，問題當然係員工缺乏歸屬感，永遠都好似都係過客。近期人事系統有鑊氣，唔少科技公司，紛紛推出應付７１３嘅方案，助人事部門升級系統，但複雜程度仍高，但有一點可以肯定，就係員工訴訟，一定愈來愈來。