上次提及獨角獸，其中一家最大叫WeWork，經營Co-Working Space。八月，WeWork由SoftBank最新一輪融資，集資四十四億美元，估值達210億美金。
經營共享空間估值咁高，好難想像。WeWork香港亦有經營共享空間，租金實惠，網上明碼實價，位置於核心地區，以同類商務中心比較，WeWork超級便宜。
雖然話，WeWork係共享空間，租戶未必一定係初創公司，甚至好有實力外地科技公司，亦可能係租戶。兩個月前，專門做數據分析嘅Elastic，搬去銅鑼灣謝斐道535號Tower 535嘅WeWork。
約咗Elastic高級首席方案架構師William Wong，講新推出6.0版本，見面即刻大讚WeWork服務貼心。
討論間，WeWork亞洲公共事務總監Jenny Chan門外經過。Jenny以往係公關公司高層，一直長駐上海，想唔到咁啱遇上。WeWork香港社區總監Kay Kam亦在場，當然落力推銷。講起WeWork係共享空間，公司有私人服務器，可唔可以搬入嚟？
Kay話絕對無問題，每1U空間幾百港幣；平過數據中心。多口問一句，如果家有愛貓，可否帶返WeWork？Kay話，銅鑼灣區就比較困難，灣仔WeWork就可以！Jenny插口，上海WeWork唔少狗隻長駐，簡直寵物樂園。
WeWork位於市區，提供創業支援，租金相對低廉。香港兩個創業園區；香港科學園及數碼港，雖然係公家機構，亦唔可以話完全無競爭。網上話WeWork早已轉虧為營，證明經營得法，共享工作空間真係有得做。
WeWork樓上就係AWS香港總部，WeWork唔少租戶，又係AWS客仔，參加AWS活動只要上落電梯。
講到，AWS公關Linda Yung正在籌備月底賭城舉行re:Invent年度大會，忙到出煙之際，誤傳出AWS要撤出中國市場，香港有同業轉載，結果以訛傳訛。其實係AWS為配合中國政府規定，以三億美元代價，出售服務器及營運資產，畀國內合作夥伴北京光環新網。如果AWS話以上述價錢，就出售所有國內業務，即係代表AWS全年推估營收（Run-rate），只得幾千萬美金，以中國市場規模而言，真係好難令人相信。國內雲市場規模以百億美元計，加上AWS無服務器運算（Serverless Computing）Lambda近年大熱，區區三億美元，想AWS放棄中國夢，似乎難啲。