旅行社遭黑客入侵，勒索七位數字贖金。唔少同業即加強防禦，但防不勝防，唔少人只係著重保密，結果資料一旦受破壞，馬上不能運作，備份亦係IT保安一度防線。
唔少公司，亦已不再保留信用咭資料，以免系統入侵後，黑客只有客戶名單或交易資料，亦無信用資料。即使蘋果電腦，保安極為嚴密，亦唔保留信用咭資料，甚至連客戶敏感資料，亦唔敢保留。
雖然話，入侵防不勝防，但係如果不幸遇襲，損失慘重，可唔可以投保險？外國已經有保險公司推出IT保安產品，不過保費點樣釐定？亦有唔同方法，美國波士頓有家保安公司Bitsight，推出類似信用保安（Credit Rating），評分低就自然保費高。
Bitsight點評定一家公司IT保安？答案有幾方面，一方面當然係從外部測試，決定該公司有幾多弱點漏洞，另外Bitsight網上建立唔少Sinkholes，蒐集Dark Web活動。網上唔少黑客控制Command & Control（C&C）機器，呢啲機器通常遭黑客俘虜控制，然後用呢發施攻擊號令。Sinkhole就係監察C&C，馬上知道部分企業已被入侵，Bitsight就計算究竟呢啲企業，用多少時間，先解決APT，然後計出保安評分（Security Rating）分數相差可能好大，當然亦有企業不知不覺，直到收勒索信，先驀然警醒。事實上，即使安裝類似FireEye之類，知道被APT入侵，唔少亦要相當時間，先完全清洗，期間就可評分，定出IT保安防禦能力高低。
Bitsight另一用途，係為CSIO評分，作為同業Benchmarking。某家銀行如果請咗CSIO，使咗唔少錢銀買保安設備服務，成效如何？好多時並無客觀水平；等到遭黑客入侵後，先恍然大悟。Bitsight可以打分，比較業內同行水平（例如旅行社當然不可同銀行比較），董事會就知CSIO工作成效，低於同行水平，可能就醒神些少。
外部測試可以有幾準確？大家可能有疑問，Bitsight甚至可比較內部保安水平；因為Bitsight從不同來源購買數據，甚至知道企業內部系統設定。聽落似乎天方夜譚，但估計香港唔少公司，用咗免費管理軟件，內部網絡架構資料亦被外間知悉。Bitsight再從多方面蒐集購入，加以分析，變成Dashboard顯示，網絡世界原來真係無乜秘密。
SingTel係Bitsight投資者之一，見Simon Lok搜尋香港藍籌公司，內部資料竟然真係一目瞭然，果然神奇。呢項服務類似Transunion保安評分，自己評分自己查。SingTel亦曾投資Fireglass，以蒙騙技術（Deception）做網上保安，可惜未及整合，已被Symantec收購。