新春見到SAS做銷售前嘅Daniel Shum，講起唔少本地銀行都係用緊SAS做數據分析，以數學模式做銀行壓力測試、客戶銷售分析、風險及欺詐評估；不過原來SAS亦有為澳門賭場分析，優化賭廳運作。
賭場通常按人流，先決定開幾多張賭檯，注碼大小，都直接影響盈利。如果太多人圍注同一張賭檯，影響開局次數，太多賭檯又影響氣氛，加埋唔同數據同埋日期作分析，可優化賭場營運，決定唔同組合。除咗賭場，SAS亦為零售業分析顧客DNA，做多渠道嘅精準營銷。SAS亦有為保險公司，自動分析客戶飛卜，提醒經紀，知道客戶家庭環境有變，可能有新保險要求。
以數據分析作預測性分析，幾乎無處不在。唔少製造業，開始利用數據分析做預測維修，即係話機器未壞前，估計有幾大機會損壞，預先更換減少停頓，地鐵早老有類似系統，公共事業亦正引入，香港水務處亦以預測維修，做緊水管保養。記憶中SAS亦曾為中電，做優化混合燃料等項目，總之乜都有數得計。
Daniel話，經營貴賓廳當然無咁複雜。但早排貴賓廳生意減少，唔少賭場集中番大眾市場，類似系統就好有作用。