電腦J手記
財爺派電子消費券，引來不少爭議，市民已經想辦法變現或消費。不過，商戶方面，如果未接受電子消費，就唔可從消費券獲得好處，今次財爺希望推動無現金社會，相信商戶積極安裝，以接納電子消費。
香港最流行電子消費，除咗信用卡，相信非八達通莫屬，但電子支付錢包五花八門，相信會加強宣傳，屆時分一杯羹，到時上演電子支付錢包大戰，可以預期。
三大信用卡集團，Visa、Master、銀聯都開發電子支付。除咗八達通錢包，近年電子支付湧現，增長最快可能係Payme電子錢包，本地支付寶及微訊支付，港產TNG亦快速增長，唔少以二維碼支付，電子消費券可能支持多種支付方式，商戶支援支付，當然愈多愈好。
商戶申請卡機，可能相當麻煩，要經銀行審查申請手續；本港早出現所謂「聚合支付」，專門同時申請多種支付及支付處理；類似「易付達」eftPay及Global Payment，就可一站式為商戶申請。聚合支付簡化商戶接受付款，一次過申請，消費者亦可選擇唔同支付。
聚合電子有多家供應商；包括國內好出名嘅錢方好近，亦係香港人李英豪成立，近期本港主力與Shopify幫商戶做網上收款。
電子Payment Processor和Payment Gateway，競爭非常大，支付處理商為商戶提出唔少優惠，eftPay同時可用於10種主流電子支付系統；包括八達通、信用卡、二維碼，更包括海外電子錢包如韓國「GLN」及台灣「街口支付」，據講可收埋Payme，一機通行。。
有次見eftPay行政總裁勞俊傑，話eftPay亦開發以手機查閱收據紀錄應用，新增電子優惠劵平台「e+齊齊賞」，可結合會員系統及電子優惠劵，小商戶可低成本建優惠營銷活動，又開發免費POS。
香港唔少國際電子支付密謀進軍，國際支付服務商FIS 旗下Worldpay發表《2021年全球支付報告》，指2020年香港現金交易佔店內消費額9%，較2019年下降咗17%；預計現金結賬使用率未來4年下跌，2024年現金於店內消費，佔比將降至1.6%。
2020年，信用卡付款仍係香港人店內消費首選，佔總交易額56%，估計電子錢包將成為增長最快的店內付款方式；預計2024年電子錢包將佔總交易額36%，較2020年上升22%。
香港有聚合支付，搞電子消費券毋須派卡；最近澳門金融管理局協調金融機構推出「聚合支付」服務，初步叫「聚易用Simple Pay」，首階段以落實「反掃聚合」，商戶將可使用一部終端機，受理所有本地二維碼支付，市民可選擇任何一種本地二維碼掃，以本地支付工具消費。