電腦J手記
近期香港四波疫情中，政府首次靠污水檢測病毒，作為大廈強制檢測甚至封區依據，不過能否揪出隱形帶菌者成效存疑，不少大廈污水因有陽性，被勒令強檢甚至成區，究意糞便檢測敏感度有幾高，是否找出隱形帶菌者？各有不同說法。但發展糞便檢測，可以找出唔少病原。
上年三月，中大醫學院微生物學系系主任陳基湘已指出，COVID-19患者呼吸道清除後，仍留存於糞便，所以糞便檢測或可成為一種篩查，找出無病徵但帶病毒「隱形個案」。
中大張立教授團隊亦研發微型機械人「QuickCAS」，機器人以靈芝孢子包裹上氧化鐵納米粒子及碳量子點使其功能化，針對檢測腸道的難辨梭菌，測系統半小時有檢測結果，亦可以檢測多樣其他肺炎鏈球菌、沙門氏菌、致病性大腸桿菌和幽門螺桿菌等病原體，亦係以糞便作體外診斷技術（IVD，in vitro diagnostic）。
體外診斷系統一般係在活體外人工環境下測試，以前係以抽血檢驗、檢驗尿液，甚至唾液診斷，糞便檢測則集中檢測結直腸癌，結直腸癌係本港最常見癌症；佔癌症新症17%，即係六名新增癌症患者，一人係患上結直腸或者簡稱大腸癌。
大腸通常係指結腸，大腸癌有時稱結腸癌。結腸位處於腹腔，從右下腹的迴盲瓣以下開始連接盲腸，往上延伸後稱為升結腸；接著再向左邊橫跨整個腹部稱橫結腸；向左下腹下降稱降結腸；連接乙狀結腸，最後才是直腸，範圍較小。
一般專科醫生為病人定期大腸鏡檢查，通常10年一次，盡早識別到瘜肉；最理想係直接照大腸鏡，順便切除早期瘜肉。但照腸鏡相當麻煩，必須先清腸，照鏡亦要鎮靜麻醉。
雖然瘜肉未必發展成癌症，及早切除可防患未然，即使大腸癌早期，以微創亦可切除大腸癌，治癒率甚高；最大問題係晚期，癌細胞通過淋巴及血管轉移（也就係擴散）至其他部位，最常見係肝臟，亦最難搞，原因係肝臟肝門靜脈與大腸相連。大腸癌也可通過腹部靜脈，擴散到肺部，變成非常棘手。病向淺中醫，一啲無錯。
早期大腸癌患者，身體可能毫無病徵，大腸鏡係最好方法，但香港好少可騰空一日檢測（因為花全日時間），政府推出「大腸癌篩查計劃」，資助特定年齡組別居民去私營醫生篩查；亦先做糞便「免疫化學測試（Faecal Immunochemical Test, FIT）檢驗，發現陽性再照大腸鏡。
本港新上市嘅生物醫藥股諾輝健康(06606：HK)開發體外檢測「常衛清」，以檢測糞便樣本，作為結直腸癌早期篩查，然後交回諾輝做化驗；原理上同美國嘅Cologuard差不多；如果發有問題再做腸鏡。「常衛清」宣稱以多基因靶點，以糞便進行FIT-DNA合併檢測，比香港一般單以FIT；「常衛清」FIT-DNA檢測以抗體檢測大便隱血，驗出糞便基因內基因靶點變突，理論上更早篩查大腸癌患者。「常衛清」亦可在家中以糞便寄出作檢測，敏感度略比FIT高，但仍比照腸鏡低，更早可發現病變，雖然有機會假陽性，但亦可鼓勵更多人去照腸鏡，亦係好事。
其他糞便檢測包括PCR，分析糞便內腸道菌群，發現敏感及免疫問題，以至患上都市慢性病嘅機會，較有代表性嘅檢測機構，係中大研究人員創立嘅生物醫學科技控股（BioMed），科學園16W投資BIOMED 科研檢測中心，已經是CAP標凖，可進行qPCR及16S兩種全方位腸道微生態DNA分析，非常先進。