近期有套電影歌Hidden Figures頌幾位六十年代任職美國太空總署黑人女性，為人類登月作出貢獻，亦揭露美國種族問題。
呢三位黑人女性NASA工程師，以Katherine Johnson最有名，獲美國總統自由勳章，NASA維珍尼亞州利蘭研究中心亦以Johnson女士命名。另一位係Dorothy Vaughan。Vaughan早於1948年就升上主管位置，後來成Fortran語言專家。當年NASA曾使用IBM主機7090，其中一場電影，電影公司邀請I記專家John Tam，放映後介紹呢部經典機器。
NASA呢段歷史可謂鮮為人知，如今公諸於世。不過，電影中I記主機，則似曾相識，勾起唔少回憶；80年代學生仍接觸I記主機，直至微型機及PC興起，先逐漸式微。
John Tam係中大畢業，應該亦有經驗碧秋樓地下用過I記主機，當年必修語言仍係Fortran及 Cobol（主機無Basic編譯器），80年代初仍有用Punch card掃啤牌輸入，不久被DEC終端機取代。當年中大創辦電算系陳天機教授，亦曾任I記要職，至任聯合書院院長，仍係I記乾收銀；獲兩項I記傑出貢獻獎及五項創作成就獎。
陳天機太座係本港著名食譜作者江獻珠女士，唔少人認識。碧秋地下放置主機系統，溫度甚低，運算結果數小時後打印出來，唔少人捱過碧秋冷氣，提起都會條件反射打冷震。
當年I記主機幾乎相等於電腦代名詞，PC當道後少人接觸。但I記又投資BlueMix雲平台，唔少人可以在z Systems主機上再次開發，真係異地重逢。