電腦J手記
美國疫情一發不可收拾，以往舉辦大型活動的賭城拉斯維加斯，變咗死城。以往每年1月CES亦網上舉行，不過規模大為縮小， CES 2021只有 1,800參展商，演講會議100個。
今年主題演講有Hans Vestberg（Verizon）、Mary Barra（通用汽車）、蘇姿豐博士（AMD）、Corie Barry（Best Buy）、 Alan Murray（Fortune Media）Brad Smith （Microsoft）、Doug McMillon（沃爾瑪）多家美國企業高管。
其中蘇姿豐係CES常客，2019亦有作演講嘉賓。蘇姿豐作為美國女性CEO，打破華人及性別兩個限制，2014年出任CEO後，迅速扭轉AMD經營困局；2018年就轉虧為盈，4年來股價升18倍，早已係矽谷神話。
CES展覽產品種類，早遠超越電子消費。每年有唔少自動駕駛及IOT技術展出，甚至有新車及遊艇推出，除咗不同消費品，各國初創亦趁CES介紹產品；香港科學園就唔少初創曾獲「CES創新獎」（CES Innovation Awards），Eureka Park內展示消費電子科研成果，今年Eureka Park仍照樣舉辦，今年台灣有超過100家初創參加，虛擬覽館早已在網上宣傳，下星期3及4有網上產品示範。
CES亦早已成各國初創介紹產品機會，除科學園外，本港貿發局係參展商，負責統籌香港展商及初創，在CES集中宣傳，價錢亦唔算貴，而且可申請政府資助。舊年每100平方呎展覽攤位，索價約係67,000港元，每年參加者甚為躍踴。今年貿發局已再無宣傳，相信忙於搞自家展覽，唔得閑搞CES了。
每年CES都有唔少消費新品上市；包括3D打印、電子玩意、擴張實境、幼兒及美容、網絡保安、無人機、教育、家庭健康、機械人、自動駕駛、睡眠、智慧家居、運動、寵物、電子穿戴、室內種植場，甚至語音助手亦佔一整個展館。
消費電子公司當然推出唔少家電；包括音響4K電視，上年無線吸塵機多不勝數，舊年小米重點介紹無線吸塵機，今年竟然已經大賣。Lenovo亦有多款筆電推出，今個禮拜有唔少公佈，其他電腦公司亦搞參館，不過宣傳效果，可能已大打折扣。
LG率先召開記者招待會，家電唔少新品，剛剛公佈LG無線吸塵機LG CordZero ThinQ新款，充電時自動清潔塵格，相當方便。