電腦J手記
不經不覺，抗疫進入一周年紀念，政府抗疫環節屢次漏洞，上次因為海員換班，今次則可能係海外檢疫人士，檢疫期間受探訪散播病毒，結果大家無貴無賤，一同遭殃。
各國之抗疫，除咗中國內地雷厲風行，紐西蘭抗疫成功，工黨民望高企，總理順利連任。事實上，抗疫成功關鍵之一，係民眾對政府是否信任，某程決定疫情能否控制，美國就係好例子；從口罩是否有效？以至疫情是否存在？都有大量爭拗，甚至變咗政府表態。
政府推出大大小小抗疫措施，唔少變咗政治鬥爭工具；「銅芯抗疫口罩」不斷被唱衰，唔少人唔願用，又形成浪費，以致草草收場。
抗疫，離不開三招；隔離、檢測、追蹤。
隔離就比較簡單，但本港已出現抗疫疲勞，好難再張弛有度。政府一味指責市民不嚴格社交距離，唔通無限期不生活接觸？
其次係檢測，較早前獲阿爺及華大基因協助，雖然亦有唔少阻力，終於建立檢測能力。其實本港亦有開發檢測，政府可鼓勵一下，普及檢測工具，有懷疑就馬上測試，有利用切斷源頭。本地研發嘅檢測，又似乎無法推出市場，唔知點解。
講到追蹤，警方運用超級電腦，發現唔少群組關係，算係相當成功，追蹤工作亦有難度，據講有人唔記得到訪地點；如今推出「安心出行」，要求場所申請二維碼，但下載量未見特別熱烈。「安心出行會」原則上係場所出事後，主動通知事主，前題事主須主動紀錄，現時爆發場所都比較特別，事主唔知想知想記得？又或者會否掃碼？留下到訪記號？
相對之下，新加坡TraceTogether以藍牙聯接，毋須每個地點掃碼，部分可用Token，不過香港政府可能因怕被唱衰，唔敢學新加坡。以上措施，如果市民唔太支持，有漏網之魚亦前功盡棄。剩下選項，可能就係自求多福。
疫情持續下，有利網購發展，國內淘寶就係例子，全靠沙士時平地一聲雷。HKTVMALL上半年業績亦首次扭虧為盈，主席發佈業績大計多多，暫時只聞樓梯響。耕開有人爭，網購平台HOME+登場，以「生活．家一點」為理念購物平台，以香港寬頻作為後盾，網購爭霸戰，有平嘢賣，可能係疫情下意外收穫。