電腦J手記
全球疫情，唔少時裝集團破產，保持社交距離，有乜人出街賣衫扮靚？IT行業筆直，則轉咗加強保安、業務持續、遠程工作，最大得益係公有雲。
前途不明朗，IT破蓆叫停。RPA舊年大熱，熱潮亦有退卻，機械人雖唔怕感染，員工要在家工作，機械人仍全天候當值，無怨無悔，照理好受歡迎。企業面對不確定，暫時停止新項目，RPA不能倖免，SoftBank 投資嘅AA，傳聞撤離台灣及香港。
疫後工作模式，從此不一樣。究竟人類可否靠科技，改變業務運作？其他科技難估計，金融科技肯定可以。
據金管局話，去年7月嘅1年內，FPS用量上升咗4倍，虛擬銀行錄得大幅增長，唔少人以網上銀行取代，避免去銀行排隊；疫後相信更多會轉用流動銀行。
唔少過數以往靠支票，如今改以電匯或電子支付，減少紙張接觸。支付一哥八達通，亦係大贏家，業績大躍進。八達通再推出流動收款機，配合商用版八達通App，畀零售及的士大哥，免現金交易減少接觸。
手機下載商用版八達通 App ，經手機提交文件，一經批核後，三個工作天開賬戶，收到商戶套裝，包括咗八達通流動收款機。開啓手機藍芽後，就可與流動收款機配對，然後開啓商用版八達通 App 「店員模式」(Cashier mode)，再輸入交易金額，流動收款機就顯示金額，可供拍卡。
商戶透過轉數快（FPS）即時將賬戶結餘，轉帳到銀行戶口，馬上收數，全無額外成本。以往商戶唔願收卡，因為銀行不馬上找數，如今如收現金，相信更多人樂於採用。
講起FPS過數好方便；無額外收費，有人事管理公司甚至用嚟出糧。FPS輸入用戶資料，電話號碼可過數，無時間限制，可用嚟交費又可增值，話過就過，花錢更如流水。
銀行支付方式之多，大家跟都跟唔切。銀行開發嘅支付技術，以往針對消費金融；亦有例子，從消費變商業金融應用，例如銀行推出Purchase Card，供商業機構向外採購之用，只要向供應商發出PO採購單，加上信用卡霖把，就可當成付款，支票都唔駛寄；收款方（亦所謂Merchant也）要申請Acceptance，銀行當然亦向商戶收取手續費。
企業一向有公司信用卡，供員工出差，或者公費應酬。Purchase Card原理一樣，供應商全部有Merchant ID及登記供貨類別，細節列月結單上，供分類及統計開支，銀行仲畀埋數期，可一次過先找數，唔駛逐張支票咁開，或者逐筆匯款，不過唔知可否淨還Min Pay？
羊毛出在羊身上，銀行向供應商收取手續費，自然亦加在報價之中。從Purchase Card可知舊酒新瓶，一樣有噱頭。