[電腦J手記][CES 2021]
電腦J手記
遠程工作變成新常態，唔少租戶開始考慮縮減辦公室規模，即使共享辦公室亦減少。如果疫情後，僱員不再返辦公室，對於租務、交通、飲食，都會構成長遠影響。
究意縮減辦公室規模，係為節省成本還是數碼轉型，從雲運算需求大幅增加，可見網上需求大幅上升，從今次疫情，亦發現部分注重數碼轉型企業，受到影響亦比較少。當然，如果行業係受疫情直接衝擊，點數碼化都無用。
除航空旅遊酒店，最受影響係展覽行業，本港貿易發展局書展延期，唔少書迷失望，剛接消息，全球最大消費展CES，2021年初改為網上舉辦。CES係每年賭城最大展覽，參加人數達18萬，每年直接貢獻近三億美元，去過都知規模幾驚人。
每年賭城約4200萬遊客，貢獻美國南內華達州達580億美元收入，涉及37萬職位。美國疫情仍處於高峰，數字高踞不下，CES變虛擬，賭城當然深受打擊，即使利息低迷，唔少亦面臨結業。
香港亦係展覽之都，貿發局正舉行夏季採購匯嘅網上展，電郵就鋪天蓋地，全球走向數碼化，以求捱過疫情，遙距營商似乎係唯一出路。
香港政府有見及此，一早就推遙距營商，但據講唔少申請者進退維谷，究竟出咗乜問題？
據聞D-Biz 遙距營商計畫，終於出咗部分結果，貪字往往得個貧，有早於5月廿幾號入紙申請； 5月18日公開申請後，第二個星期就入紙，HKPC現在才批出，差不多用2個月審批。
其中有案例，每個方案想申請8萬港元；共3個方案，一個批咗2萬3千幾，一個批咗2萬8千幾，一個申請被拒。從結果顯示，凡低於3 萬嘅申請，即毋須Auditor Report 哪種，據講批得比較快，一單HKPC批咗2萬6千。
另一教學機構，申請6萬一個方案變遙距教學，最多只批3萬幾，即批約50%申請款項。另一方案完全被拒，最後一個只批1萬8千幾。
不少申請集中視像會議，以為搞視像會議，一定命中主題。原來係未必，有申請6萬幾港元，購買視像會議，完全被拒。HKPC指，Video conferencing無助經營現行之生意模式，拒批整個方案。
有關D-Biz申請亦可上訴，申請方亦可跟供應商協商，削減方案嘅內容，調整至筆直內完成。供應商若無法縮減規模，申請者就要支付餘額，差額自掏腰包。據說唔少申請人正上訴，HKPC則記錄在案，轉交創科局裁決。
睇呢D-Biz行政費用極高，HKPC為過濾「水份」，做到索氣，又與申請人周旋。早知如此，倒不如學財爺大方派錢，比較寬鬆方式，每家派少啲經費，但簡化程序審批，多啲人得益，大家更有預算，又免傷和氣。