[電腦J手記][抗疫]
電腦J手記
新冠疫情，剛聽商湯朋友話，渠地抗疫神器體溫檢測SenesThunder -E mini，日本竟然賣出超過一萬件，呢個神器安裝在多家餐廳，以至科學園。商湯進入美國實體清單，不過產品照賣得唔錯。
抗疫三大課題，係檢測、治療、疫苗。檢測以亞洲國家最好，殆無疑問，美國總統當然有不同意見。亞洲各國檢測數量及程序，堪稱典範。
以檢測而言，全球以核酸檢測（PCR）為主，即使有抗體（Antibody）及抗原（Antigen）快速測試，不過抗體測試會有漏洞，有時感染未有即時產生抗體反應，以血清測試可能未搵唔到。而抗原檢測則利用抗體去檢測，無呢類時差問題（感染後即時就產生抗原），而且唔一定用血清，可以從鼻咽取樣，但係抗原檢測難度亦甚高，須凖確認出抗原獨特刺突蛋白（Spike）。據世衛報告，抗原檢測敏感度（Sensitivity）只係介乎34%至80%，假陽性較高，美國亦只批准咗一隻由Quidel開發嘅抗原檢測，本港科學園亦有研究機構開發抗原檢測，希望突破瓶頸，目前已在醫院試驗。
以往，中國製試劑質量麻麻，經此一疫，質和量飛躍發展；香港試劑以歐美貨為主，但本地實驗室容量有限，最近終於引入兩家中國大陸私營機構協助。
PCR優點係相當凖確，缺點係須實驗室進行，非常花時間，過程容易出錯，難做快速檢測，為增加流通量；亞太地區多國就以「集合測試」（Pool Testing），同時檢測四至五人樣本，加快檢測能力，並快速應變；素有「美國鐘南山」之稱衛生專家Anthony Fauci，早力推「集合測試」以擴大檢測能力，FDA終於剛剛批准，稍後美國檢測量，有望倍增。
遲到好過無到，亞太區發明唔少檢測神器；韓國就發明檢測車，往各區機動檢測，減少患者外出，然後推出COVID-19病毒樣本採集亭。採集亭其實係有密封有換氣消毒，類似電話亭嘅小隔間，外露一雙膠手套，不停在亭外採樣，採集人員坐在亭內，毋須全副PPE武裝。中國較早前在北京空地，大規模樣本採集，結果多名身穿PPE人員中暑，馬上引入韓國雙向步行採樣亭設備，中國在學習新事物，捉老鼠就係好貓。
講到神器，就要講治療醫藥，以Gilead藥廠瑞德西韋（Remdesivir）係唯一獲世衛肯定嘅神藥，不過美國及巴西總統則力推另一神藥─「羥氯喹」（Hydroxychloroquine）。中國則有三種中藥獲批治療，以發熱輕、頭疼重，就用金花清感；發熱重、大便秘結，用連花清瘟；重型、危重型的炎症風暴，就用血必凈，本港同仁堂有售連花清瘟，畀大家看門口；民間有獨門秘方，流傳金銀花加甘草，相信大家近期飲唔少。
中國檢測新冠肺炎有另一神器，係以電腦斷層掃描（CT）隔離可疑患者，以人工智能作快速篩選肺炎患者。武漢初期大量假陰性，加上試劑短缺，就發明以CT掃描，建立AI模型將CT掃描結果，與患者年齡、是否咳嗽或發燒、白細胞計數等臨床數據結合，建立了「融合模型」模型作預測，醫學期刊研究論文指，凖確率近八成半。
CT掃描成本唔低，中國對抗COVID-19，不計成本，濕濕碎；國內CT掃描仍係GPS（GE、飛利浦、西門子）三分天下，國產CT近年冒起，國內東軟醫療正申請上市，佔去1成市場，前途無限，相信有得炒。
中國亦一直在高端醫療設備打破GPS壟斷，另一家在上海創立，擬在港上市，進駐科學園嘅美時醫療（Time Medical），係中國千人計畫專家馬啓元教授創辦，較早前推出神器紫外線消毒機械人對抗疫情，原來Time Medical亦生產7T（Tesla）磁共振（MRI）生物成像系统，甚至研究14T產品。一般MRI只係1.5T至3.5T磁力，7T屬於極高清體外成像技術，分辨率顯像可作活體腦神經成像分析，用嚟研究腦部疾病，據聞香港兒童醫院、中大醫院等均已入貨。
香港放射治療係GPS天下，植根甚深，配套複雜，7T磁共振（MRI）呢類科技，亦唔算太新，美國甚至有10.5T在試用，點樣打入香港市場？呢家Time Medical說服香港放射治療專家；的確係唔簡單。
可惜疫苗好難有神器，美國政府已投資在多家藥廠，Moderna高層更好消息出貨；中國康希諾生物／陳薇及牛津均則進入臨床II期；即使疫苗有效，大規模接種，相信亦幾年，短期難以解決危機，大家自求多福。