[電腦 J手記] [Whiz][SoftBank Robotics] [醫療無線吸塵機械人]
電腦 J手記
香港再現社區爆發，限聚令重臨，各行各業，尤其係唔少零售，又再承受一次打擊。
不過每次疫情過後，從好處看係更注重衛生，香港唔少地方徹底清潔，設備重覆抹洗，不過苦了清潔工人，每日筋疲力竭。
日本人一向亦以乾淨見稱，但人口老化，工人嚴重不足，解決方法就係開發機械人。日本SoftBank以科技投資聞名，亦經營SoftBank Robotics，開發咗NAO及Pepper機械人。SoftBank Robotics亦在出售無線吸塵機械人Whiz，解決疫情打掃繁重工作。
無線吸塵機械人成行成市，不過Whiz係工業用的級數，現在部署在香港多個商場。日本設備機械人已有相當長歷史，而且以乾淨聞名。Whiz有多項實驗結果及認證，掃地吸塵工作也十分認真。究竟吸塵點有乜客觀標凖？原來檢測環境清潔成效業界早有標凖，業界有「生物冷光反應檢測法」（Adenosine Triphosphate bioluminescence），簡稱ATP檢測，檢測醫院無菌及清潔，就以ATP計算環境衛生程度。
以人手清潔ATP一般係約6成，Whiz達到9成以上；唔會清潔時造成二次污染。據講Whiz清潔地氈，比一般吸塵機更徹底。除咗識得吸塵，Whiz行過亦順便亦識得過濾空氣，具備2個HEPA空氣淨化機，除去室內PM 2.5微粒。
Whiz充滿電可以操作3小時，而且可以換電，每次可清潔500平方米。Whiz同市面上隨機四圍行嘅吸塵機械人唔同，除咗懂得避障，亦可以規畫路線，每部機械人可預先規畫600條唔同清潔路線，路線上載至雲端，並且可以教其他Whiz機械人，完成後產生清潔完成報告，並可從手機知道清潔成效。
工人好似推車仔，首先設定起點，就可教Whiz機械人巡迴路線，Whiz具備激光雷達（LiDAR）、視像鏡頭、深度鏡頭等無人駕駛技術，Whiz其實亦係小型無人駕駛車，或者稱為Autonomous Mobile Robots（AMR)，即係話毋須在環境設定標記，全靠LiDAR掃描附近地形及障礙物，繪製地形後，就可按行走路線凖確移動。工人可教Whiz避開地面凹凸不平，設定過程簡單，基本上毋須任何訓練。
Whiz工作過程遇障礙，唔能夠自己解決，電池量不足，亦會發出求救。機械人完全係物聯網 (IoT)，結合雲端技術，並且內置有4G連線，毋須任何連線設定，所以可以隨時監察，亦可自動協調多部機械人。據講未來開放API，結合其他用途，例如途中蒐集數據，增加其他用途。香港現在亦係清潔人手緊張，可以考慮一下。