上星期華為分析師大會，除集中介紹新BU負責雲運算，就係介紹未來為營運商推出視訊串流服務。今年CES，Netflix老頂Reed Hastings表示，流動營運商可能向用戶，提供無限上網嘅煲劇優惠。
從4G到5G，仍然有三年時間。5G制式要在2019年落實，最快亦要2020年開始推出。靠流動營運商食糊嘅華為，當然希望營運商期間做多啲業務，除咗雲運算，希期加埋視頻串流，增加收入。
今年CES有唔少8K電視出現，華為積極發展H.266編碼技術應用。本來8K應該係電視或者顯示器廠商問題，華為竟然4K講到8K，可見搵一片藍海，實在唔容易。
即使今日，4K UHD內容仍然好缺乏，究竟8K有乜用？4K出現後，至少1080P電視降價不少，可以話係唯一好處。不過其實網上有唔少內容供應商，開始推4K UHD內容。但唔少業內認為，HDR技術先係4K真命天子。
Netflix就力推4K HDR，支援HDR-10 或Dolby Vision。HDR-10不單畫面細緻，亮度高，色彩更加豐富飽和；側聞Dolby Vision色彩更動人，支援動態HDR技術，但較少電視兼容。Adobe力推HDR，Netflix內容就係同Adobe合作，唔少內容或遊戲開發人員，好快要換機製作HDR，至少要換張顯卡。
要睇HDR-10，當然要換電視（又換？）；或者換埋電腦，顯示器亦通通要換。顯示器方面，戴爾剛推出UP2718Q，螢幕27吋，支援HDR-10。
戴爾UltraSharp系列屬於專業級顯示器，配搭工作站電腦，UP2718Q價錢當然唔平，約二千美金，但公佈標準就一般HDR-10電視仲勁，量度HDR色彩豐富度Rec2020標準達76.9%，係目前顯示最廣闊色彩範圍顯示裝置；相信消費版本好快推出。