上星期香港示威破壞九龍灣智慧燈柱，事後解釋當然是溝通不足。中國利用人臉識別作為監控，唔少人以為政府變成「大阿哥」，無所不知，可監控一切。本港燈柱基建落後，智慧燈柱首先要穩定電力，其次係傳輸能力。上述兩者係大挑戰。一般燈柱約有350 Watts，PC火牛輸出約從200至1800 Watts。
政府一再強調，智慧燈柱無監控功能，更唔駛講傳送番大陸，不過今日唔得，唔代表將來唔得。全港早有唔少天眼，每次刑事偵緝，警方都係利用閉路電視、手提電話、八達通查案。
另外，燈柱必須要有數據傳輸，有人指可用4G，但數據傳送要頻寬，做咪錶還勉強可以，串流影像大量數據傳輸，則幾近不可能，燈柱將來會安裝5G基站，不過燈柱底部要有光纖Backhaul，否則數據如何傳回核心網？每支燈柱再加光纖，費用更驚人。
當然，如果願意花錢，亦可安裝光纖，不過數據儲存又係另一問題。有人以為可以用AI識別，不過邊沿運算力依然昂貴，如果安裝燈柱上，電力供應及價格都唔平。從技術角度，智能燈柱作為大規模監察，技術仍未成熟，涉及成本等問題。
智慧燈柱有唔少傳感器，以及定位功能，亦可以用於未來輔助駕駛。不過暫時只用於交通、氣象及空氣質素。交通則係指人流及車流，唔少地區研究利用雷達，取代利用高清鏡頭。過去幾年，Infineon推動雷達應用，雷達能用大概形狀估計物件，雖然唔可辨認車牌及顏色，只能做統計，亦一定限制，勝在功耗較低，省電又容易部署，好適合用在智慧燈柱，決定附近有否交通擠塞，傳回路況人流及車輛。
科學園有家King City，創辦人Gary Wong就想出先用雷達掃描，訓練模型辨認物件，例如發現違泊車輛，可傳回有關MetaData（即數據嘅數據，而不是數據本身），拍照一次傳回路況，或者索性即刻通知保安，減少耗電及傳輸數據。King City亦用雷達偵察街道人流，甚至廁格有無人用緊。
韓國亦有家叫Bitsensing，專門用雷達偵察路面交通。雷達只計算人流，體積好細，部署比較簡單，甚至可用4G傳回數據。據Arrow電子亞太工程方案中心總監YS Chan話，幾年前政府做燈柱設計，當時雷達技術並未普及，近期Infineon及Arrow電子大力宣傳，唔少人知道雷達優點，近期唔少人詢問雷達應用。
雷達甚至可偵察人類呼吸及心跳變化，家中有人心率不正常時可作出警示。
本港主要燈柱供應商JWE，亦係本港HKT及HGC技術夥伴，另一家供應商則係淡馬鍚旗下新加坡科技工程ST Engineering，JWE可算係本港專注IOT公司，燈柱管理當然涉及唔少IOT，JWE亦負責監察樹木。JWE亦係Arrow電子夥伴，相信會研究有關技術。
本港東九龍以外，科學園亦有實驗，據聞中文大學亦已批出資助，安裝智慧燈柱，以目前社會氣氛之下，如果唔想智慧燈柱再成攻擊目標，政府可能要考慮下放棄鏡頭。