上星期到訪南山區中大研究院， 該區叫虛擬大學園，話叫虛擬，其實已經有六十幾座全國大學研究中心，包括香港六大院校研究中心。
南山區係深圳高新科技區域，而深圳又吸引各地院校開設研究院，並且有各種乾濕實驗室，以前國內研究經費唔可以過河，申請研究項目經費，必須國內有據點，去年國務院容許科研資金過境，中大深圳研究院亦撥出地方，轉為眾創中心。
中大深圳研究院唔可以頒發學位，但可定期做學術交流，剛剛以色列理工學院教授Avishai Mandelbaum就訪問過深圳研究院，又曾同以色列共同舉辦多次活動。據研究院院長鄭漢其話，中大醫學院亦曾向深圳介紹本港婦產科技術，介紹中大醫療經驗到深圳。
眾創中心內有唔少初創，已打入國際市場，人數一年增加幾倍；其中「深慧視」開發高速高清三维成像系统，就應用在機械人及精密測量，一般視像鏡頭缺乏景深及3D數據，好難知道遠近，其中微軟收購嘅Kinect就係著名3D鏡頭，深慧視開發嘅成像算法，利用FPGA加速，對於機械人及高精密生產非常重要。
呢家公司通過高速和高解析度投影系統，為靜態物體或運動物體三維掃描，速度全球最快，已應用在精密製造業及測量，3D鏡頭亦係機械人最關鍵技術之一，應用前景極廣。深慧視CEO嘅呂聰奕介紹，深慧視董事長劉雲輝乃中大教授，亦係著名嘅天石機器人研究所所長，早年在東京大學取得博士，現時又正將深慧視技術外銷到日本。
上期講到剛獲Hong Kong X-Tech千萬級投資嘅VoiceAI，據創辦人Kevin Li李亞桐話，VoiceAI亦進駐咗Hong Kong X在九龍佐敦嘅共享辦公室。上星期，Hong Kong X投資總監江振鴻就到深圳中大研究院眾創中心，做投資者分享，向初創解說初創應如何向投資者解釋大計。
江振鴻曾任職E&Y企業併購部、Sequoia紅杉資本、騰訊投資部，投資經驗豐富，幾乎無寶不落。Hong Kong X深圳前海亦設有共享辦公室，不過渠話中大眾創中心環境，比前海有過之無不及。
江振鴻向初創教路，少不免講下渠嘅得意傑作；其中一家可將普通單車，簡單轉換為智能電動越野單車，呢家叫CYC Motor嘅初創位於科學園，創辦人讀建築時已開發產品，獲得Hong Kong X投資，呢個中軸電機齒輪組，開業後已獲得北美地區，首筆一千萬美元訂單，還未計入未來配件等市場規模。
Hong Kong X投資公司係Sequoia全球執行合夥人沈南鵬、加上香港科技大學教授李澤湘及香港大學教授陳冠華聯合創辦；特色係有廿多位教授級專家。如果初創獲投資超過5%，就會有兩位教授，免費提供諮詢服務。
江振鴻渠話香港創業風氣，仍同北京深圳，有一段距離，話Hong Kong X還有一本由學生義工撰寫的《國內創業手冊》，包括各地創業流程及各地政府資助，免費提供給香港創業者，打入國內市場。
江振鴻話渠在騰訊任職之時，股價只有140元左右。只要有眼光，投資初創，分分鐘悶聲發大財。