電競全球火熱，電競又成為2022年杭州亞運體育項目，推廣活動幾乎無停。今年11月9日至11日，「阿里體育 WESG 香港電競節 2018」會在亞洲國際博覽館舉行大型公開賽，5個比賽項目公別係《反恐精英：全球攻勢》、《DOTA 2》、《星海爭霸 II》、《爐石戰記》及《PES 2019》，出線選手將直接晉級到2019年3月於中國重慶舉行的WESG全球總決賽。
為咗推廣電競運動，剛過去星期日，又一城舉行咗「又一城 x 阿里體育 WESG 香港電競節2018」，仲有示範項目「ER電競賽車系列賽(資格賽) 」，資格賽賽事出線者，又可參與11月亞博舉行「ER Esports亞洲電競賽車錦標賽」，同中國、台灣及馬來西亞代表選手同場競技。除了以新概念賽車遊戲《RaceRoom》作主打的電子競技賽車賽事及予公眾試玩外，仲有源於日本，風靡全球嘅AR 電競對戰遊戲《HADO》，6個玩家戴上備有智能手機頭罩，分兩隊進行對戰，做出「出氣功波」、「儲氣」及「放盾」等動作，體驗AR趣味。
電競作為全球大產業，本港比賽亦愈來愈多，相信可吸引更多商業贊助，只係唔知幾時會有電視直播。
上星期最火爆新聞，彭博社報導美國上市Super Micro底板被大陸植入間諜晶片，雖然涉事4家公司（Super Micro、蘋果、Amazon、Elemental）強烈否認有關報導，但無助股價表現，今期本刊亦有專家分析。Super Micro係台灣工程師梁見後所創立，唔少著名基建服務以合約形式生產硬件（即係以White label為主），Super Micro亦生產著名超融合架構Nutanix嘅硬件。寧可信其有，唔少人就討論究竟其他主機板亦有無「加料」？當然Super Micro亦係循例否認。
中國人話有筆如刀，對於上述兩家公司，彭博報導殺傷力之大難以估計。從硬件植入攻擊，理論上比軟件要有效。一旦被發現，可從供應鏈追尋來源。蘋果同Amazon如果證據確鑿，按理毋須包庇。今次股價大跌，最傷可能係股民。較早前Tesla老總馬斯克私有化言論，導致股價大幅波動，結果被美國證監會起訴。今次彭博社報導，Super Micro慘跌，會唔會有餘波？大家且拭目以待。