中午到科學園都知，8W尚湖樓內楠天餐廳，經常座無虛設。原來楠天創辦人Eric麥叔叔，從事環保行業，研發太陽板及能源控制，麥SIR嚟自科研背景，對飲食行業有新見解，結果應用咗園區公司NAMI嘅納米Nano Bubble養魚，唔單止環保清潔，毋須化學添加，即養出健康美味河鮮海鮮，渠話以氮氣Nano Bubble，仲可作食物保鮮。楠天園區大受歡迎。Eric原來廚藝一流，除咗一般日常食譜，Fine Dining亦有大廚水準。
上星期Eric親自下廚，招呼園區好友，烹調手法創新，一味沙巴龍躉，豆腐漁湯過橋，佐以羽衣甘蘭，真係一絕。唔少食完，叫Eric再搞埋私房菜。
Eric話創新和美食，可並行不悖，令人想起西班牙廚神Ferran Adrià和Elena Arzak，尤其Adrià無做El Bulli之後，致力於推動創新改革廚藝。創新可尊重傳統，傳統亦唔應該怕創新，所以西班牙飲食業，多位大師影響下發揚光大。所以，園區搞創新固重要，亦不忘美食也。
納米科技用於養魚，IoT及人工智能亦應用在飲食方面，上星期到數碼港咪記，遇到Sumrita Chander，剛從Symantec轉職咪記。傳訊部高級總監Andrew Pickup請本港媒體到銅鑼灣酒吧，顧客自製品味啤酒，仲可以自製品牌帶走，完全係IoT釀酒技術，如今類似Microbrewery成行成市，亦拜IoT技術所賜。
香港搞智慧農業，大有人在，香港金融界達人甄華達，重返校園，修讀港大博士，竟然研究養珍珠，做埋現代農夫；以IoT技術監察水溫，調整養蚌環境，又用RFID監察植入珍珠核，預先計算收成，唔會吐出嚟都唔知，又可做控制實驗，再訓練埋AI模式，自動為珍珠成品分類等級，珍珠值幾錢，唔駛四圍格價，可算係高科技養珠代表。甄先生又從事貨櫃內魚菜共生，種植士多啤梨，鮮甜多汁，保證無農業污染。
地球人口愈來愈多，涸澤而漁；地球資源終會耗盡，高科技農業係可持續發展出路。香港唔少有心人，地球真係有希望。