電腦J手記
星期初，環球貿易廣場（ICC）的「天際 100」觀景台，SmarTone為「5G LAB」舉行揭幕儀式，率先參觀了5G LAB。
類似5G展示，幾乎家家營運商都有搞過，不過SmarTone舖排好有心思，從SmarTone網絡設計到各種可能用例，都有詳細介紹。好多人以為5G係答案尋找問題，因為5G極速，又可大量接入，點樣去利用5G，則仍然未有好多用例。
原來幾年之前，SmarTone考慮投資5G，先要搞清楚乜嘢係5G，執行董事馮玉麟曾走訪多個國家，與全球營運商、設備生產商、科技公司會面，探討5G的未來發展。
馮玉麟回憶無數次訪談，唔少營運商講就對5G讚不絕口，但一講到投資，就有唔少顧慮，要考慮回收成本，又要顧及股東派息，大都話係謀定後動，以觀望為主，但訪問Uber之後，馮玉麟即刻完全改觀。
「Uber高層一語道破，發展5G的關鍵。回顧Uber的成功，歸功於4G實現了精凖定位和導航成。如果沒有4G，Uber不可能憑空創新。佢哋以為5G以後，全球也肯定出現多家類似Uber創新突破。」
馮玉麟話，佢以為Uber呢位高層好有遠見，大家唔願意投資，如果SmarTone迎難而上，或者可搶佔先機，結果香港已成為全球5G覆蓋最好城市之一。
講番5G發展，可以話一波數十折，歐洲營運商因經濟問題，口爽荷包立，加上跟美國制裁華為，組網成本大增，結果拖慢進度，美國則因頻寬問題，遲遲未能解決，毫米波成本又過高，香港及中國大陸首先以Sub-6波段建網，更易覆蓋所有範圍。
好多以為5G速度快，一般應用並無需要咁快速度，同樣理由，亦可套用在電腦處理器及互聯網速度上。每次速度大躍進，都有人質疑係浪費，不久就會有新應用出現，完全用盡新增嘅速度及容量。
另一個現象，每次科技進步後，以至網絡提速，後果係企業營運效率上升，再拉動經濟增長，技術升級愈遲，經濟增長就愈慢，經濟增長與科技掛鉤，愈來愈明顯。如果5G發展亦追隨歷史步伐，香港就有運行矣。