台灣宏達電HTC全力投入VR，屬下品牌VIVE宣佈推出1000萬美元「虛擬現實影響力」(VR For Impact)計劃。Vive會在聯合國世界糧食計劃署帳篷營地，展現特別虛擬現實體驗，畀參與者走進其他人世界。
據報Sony PlayStation VR推出後，曾江都讚無得彈；同時無得賣，缺貨情況持續，「PlayStation VR All-In-One同捆裝」盛惠港銀3,980，支援YouTube VR後；內容上更佔優勢。PlayStation VR銷情上，遠較VIVE為佳，可以話係不爭事實。
但Vive宣佈會大舉開設VR體驗館；前幾月Vive深圳坂田開設首家VR俱樂部，現場體驗唔同VR玩法，據聞非常成功。最近深圳市摩艾克科技屬下VR體驗店亦在深圳開業，唔少VR廠商又辦加盟店，雖然香港亦有唔少體驗場，大陸市場大，論規模數量，肯定唔及深圳，加上大陸創新企業開發內容，今年VR場肯定成行成市。上深圳玩VR，可能成為未來另一假日節目。
2017年施政報告之後，各界回應不同，香港電腦學會指出，原來香港科技創新，過去一年有唔少重大成就，除咗麻省理工學院及瑞典卡羅琳醫學院來港成立研究中心，香港初創企業數目增長，亦較舊年多出四分一。
據香港電腦學會觀察，目前本港初創企業只约有二千多家，但唔少來自國際及多元化業務公司，佔所有初創企業約三成半。呢類初創企業揉合不同文化背景及專才攜手合作。香港電腦學會會員參與數碼港同埋科學園初創企業培育申請審批，發現來自海外公司數目顯著增長，可說係推動本港創新生態良好現象。
初創企業駐於本港，好大程度係本港接近中國市場，文化環境語言，以至法律等都容易適應，深圳係全球硬件初創最大基地，本港作為中國門戶，又另一次轉型。