電腦J手記
雖然美國肺炎、死亡、住院人數創新高，美國股市強勁，杜指見三萬。Jim Rogers不斷警告，崩圍近在眉睫，美股睬你都傻，照升可也。
Jim Rogers理據係，聯儲局大規模印錢紙，未來10年全球經濟路陷入困境。全球政府大量發債，債量之多，遲早積重難返。美國下任政府財長；前聯儲局主席耶倫（Janet Yellen），任內亦以量化寬鬆馳名。美國經濟不以印錢有罪，其他政府更無懸念，瘋狂印錢。
印錢推動經濟，基本上唔駛政策。從日本經驗，政府負債愈大，長期維持低息，扭曲資源分配，錢向資產尋求出路。
科技股之中最矚目，係股神巴菲特加持嘅Snowflake。上星期，Snowflake一度升超過2成，最高見330美元，市值曾達900億美元，呢個水平相等Snowflake預計2021年度收入超過150倍。巴菲特持610萬股，以9月16日上市成本價120美元計算，賬面利潤達12億8千萬美元。
Snowflake究竟市值咁高，令人莫名奇妙，Snowflake係雲原生數據倉庫，類似阿里雲AnalyticDB和AWS的Redshift。Snowflake特點是分開儲存及運算，用戶可以採用S3低價物件儲存，只係AWS亦有類似技術，Snowflake非獨家，唯一解釋可能係股神顯靈。
上周，開發疫苗嘅Moderna升過5成，其他繼續向上Zoom及Tesla。Zoom公佈業績2021 財政年度第 3 季收入為 7.77 億美元，較去年同期上升 367%，而同季擁有超過 10 位員工的客戶約有 43.37 萬名，較去年同期增長 485%。較早前Tesla第三季業績，收入高達88億美元。疫情之下，業績加上水浸，美股易升難跌。
本星期有兩個重要科技會議；包括AWS及Qualcomm（高通）年度大會，雖然疫情嚴重，科技會議仍然繼續，科技行業可能係唯一不受影響，甚至疫情下受益行業，遙距工作及多個疫情下轉型工作，都須科技配合。5G出世，過去一年高通升咗一倍，上星期最高150美元，AWS母公司Amazon則已達3200美元，亦係一倍。