[電腦J手記]
電腦J手記
中國、韓國、德國相繼出現本土病例，隔離措施可能又再生效。上述三個國家檢測素有經驗，即使有第二波，擴大檢測就可減低疫症蔓延。
從現時各國經驗，檢測愈多愈準確; 技術愈先進，死亡率就愈低，傳播就愈受控制。香港及新加坡檢測處於高水平，死亡率偏低。
據英國廣播公司（BBC）報導，各國控制新冠疫情水平，竟然同較早前倫敦智庫Legatum Prosperity Index對各國公共醫療排名，竟相當吻合。
Legatum Prosperity Index公共醫療榜排名如下：
- 新加坡
- 日本
- 瑞士
- 南韓
- 挪威
- 香港
- 冰島
- 丹麥
- 荷蘭
- 奧地利
美國不在10大之內，美國醫學研究領先，藥檢更是全球標準，公共醫療卻過於依賴保險制度和私人部門，唔少人醫療保障都缺乏，部分醫院甚至在破產邊沿。上述排名亦與檢測能力成正比，日本CT掃描首屈一指。唔少人以為，中國內地及美國檢測五花八門，香港唔夠進取，實際上香港只係用上嚴謹嘅檢測，漏網之魚，反而較少。
美國檢測一直唔達標，CNN一次訪問，Microsoft創辦人Bill Gates直指美國檢測數據係「假大空」（Bogus），一般檢測兩至三日先有結果，結果係陽性，感染者已傳染多人，唔通向呢幾日接觸過嘅人四圍道歉?
美國醫院開始留意「無聲缺氧」（Silent hypoxia），發現新冠肺炎病人死亡率原因，其中包括染病後毫無癥兆，直至有病徵入院，血氧飽和度跌剩50%，馬上戴呼吸機續命，亦係死亡率偏高嘅原因。
病人肺炎只係輕微，治療率相對較高。家用血氧計可以作為肺炎嘅生理標記，一旦血氧飽和度下降，馬上及早就醫。
一般血氧計只係續次檢測；以穿戴式設備嚟講，華為Honor 及Fitbit亦有血氧計功能，可惜非連續檢測，只算有好過無。Honor 手環 5三舊有找，仲埋監察睡眠，可謂「良心價」。一般家用血氧計，即使係減價亦索價三舊。
中國早就注意血氧飽和度嘅重要性，杭州有家叫兆觀傳感科技開發兆觀智慧健康指環，亦係智慧血氧監測設備，採用醫用級監測技術，重量僅10克，伸縮設計，佩戴時可在指腹部位連續12小時監測血氧，本來用在監測慢阻肺（COPD）和睡眠呼吸暫停綜合征（SAHS）篩查氧氣，較早前亦轉用來檢測新冠肺炎。
無論症狀是否嚴重，一旦發燒自我隔離，注意血氧飽和度，如果持續走低，就建議去醫院做PCR檢測，以免肺炎達危險期亦不知。
科學園有家叫培育企業叫「倍靈科技」，研發「倍靈指環實時監測系統」，贏過多個獎項，獲醫管局試用應對新型冠狀病毒疫情。「倍靈科技」亦可以從血含氧量找出感染患者，「倍靈科技」開發嘅檢測指環屬於醫療級，更凖確預測新冠肺炎病人。
成人血含氧量低於93%或兒童低於90%，立即應就醫治療。倍靈準確量度血氧含量，可高效協助找出無症狀感染患者。
科學園亦有兩家公司檢測技術已進入測試，包括原本從慢性病檢測，從國家重點實驗室分拆成立嘅Immunodiagnostics，以及開發Lab on Chip嘅三和生物科技。香港有唔少深科技，一定要發揚光大，圓過外國月亮。